International tetendangertemi Myanmar election tendangtsüla: Suu Kyi

Naypyidaw, September 08 (Agencies): International tetendangertemi taküm November ita agitsü ayongba Myanmar election agibaren tendangtsü takhangba olen ka Myanmar opposition lenila, Aung San Suu Kyi-i tanü Mongolbar nü metetdaktsüogo.

Mitkartemi par tashi amshia Myanmar madak küm jenti yimsü asüba sülen 2011 nungi tenzüka nübur lenirtemi tentetba sorkari par linük yimsüsütsü tashi agizükba Myanmar nung tan mezüngsüa general election sentong agitsü ayonga lir.

“Küm 20 dak tema nung Myanmar nüburtemi tan mezüngsüa election nung shilem agiba ajanga pei linük nung temelenshi tajung bener arutettsü anungji, nüburtemi iba maongka tajung ya amajok nung mesüidaktsütsüla,” ta National League for Democracy (NLD) yimtenren telok lenila, Suu Kyi-i tanü ajungshia ashi.

“Ano, tan election ya ochishia agiba election ka südaktsütsüji Myanmar nüburtem asoshi kanga dang tongtipang ta alimaia angatetdaktsünür,” ta shia, election den sentakba maparen ajunga ozüngi melaba ama ochishia inyakdaktsütsü mechi kasaji international tetendangertemi tendangtsü takhangba olen ka lai benok.

“Election agiba jakdang, election agidang aser election tembangba sülen inyakba maparen ajunga tendanga ozü linük yaritsü mepir. Iba ama shilem agiba ajanga ajaki agizüktettsüsa aser nübur nem tajangzük bener arutsütsüsa ozü election sentong takok ngua agitettsü,” ta Suu Kyi-i temepishiba olen ka metetdaktsü.

Tanü nungi tenzüka par election den sentakba nüboyimtsü sentongtem ayonga agitsü asoshi anogo latetja lir.

Tan agitsü ayongba election nung Suu Kyi-i aniba NLD teloki takok tulu angutsü ta nüburtemi teimla tulu ayuba osanga jangjaogo.