International Women’s Day 2016 Omen- “planet 50-50 by 2030; Step It Up for Gender Equality”.

by, Tiala Imchen, Dimapur.

Iba ocet azünger tetsürtem (women & girl) ajak dangi IWD tepela anogo lemsateper. Alima nung tetsürtemi, Tsüngremi la nem agütsüba sempet amshia lenla balala nungi mapa tajung jenti lokti asoshi inyaktetba takoktem bilemteta alima rangben nung Iba amung ya tanü amunger. Aser Iba ama tongtibang anogo nung ya tetsürtem mangdang asangsang nung atalokdaktsütsü atema, teburtemi tangatetba nung tetsür nungitta yaritsü kanga nungdaker.
Tamasa IWD tenzükba tatsü agi-
1910 küm international women’s conference ka ayongzüka Copenhagen, Denmark nung senden ka mena liasu. Iba senden nungji tetsürtema kasa temeten akatsü atema onük süoka jembi.
1911, March ita 19 nü IWD mezüngbuba alinük pezü, Austria, Denmark,Germany aser Switzerland nung nisung million tema agi munga tenzük. Iba mapang tetsürtemi akangbaji “right to vote and to hold public office”, aser tetsür o tebur na mapa nung telemdang (employment sex discrimination) anema noktak. America Lima nungbo National womens day, par sasep nung Febuary ita tatemlen Deobar anogo nung munga aru.
1911 küm nungi IWD-ji munga aru saka linuk ajak nung kasa anogo nung lirumedema amungtsü tenzükbajibo 1914 küm March 8 nü, Ibaji Deobar anogo ka liasü. Tanü tashi alima rangben nung kasa anogo 8th March nung amunger.
Taküm 2016 omen-ji kechiba “planet 50-50 by 2030; Step It Up for Gender Equality” nung ajemdaker amunger ? Kuli aika dang lir. Iba omen ya ajanga 2030 küm tashi nungbo tonger alitsüba tebilemba nung Sustainable Development Goals (SDG) tasenba nung züngya pongo nung shia aliba ama, tetsür o tebur na kasasa jenjang nung alitsü, aser tetsür ajak tashi itta kümdaktsütsü aser ano züngya pezü nung aliba ama ajak atema shisaliok tajung agütsütsü aser taküm piyong angazüktsüba jenjang ajungkettsütsü asoshi lir. Iba omen ya ajanga UN women’s step It Up initiative aser gender equality, women’s empowerment aser women’s human rights mapatem nung tali bendanga agüja inyaktsü renemshidaktsür.
2030 Agenda dak aketba tongtibang nükjidong :
— 2030 küm tashi nungbo tetsür aser tebur chanutem ajak free, equitable & quality primary & secondary education renemba ajanga tangazükba jenjang tajungba kümdaktsütsü.
— 2030 küm tashi nungbo tetsür aser tebur chanu ajak nem pre primary education tajung agüja aneplauba ajanga primary education melamelaa angazüktettsü.
— Alima ajaklen tetsürtem anema mezüngmeshiba mapa ajak anentsü.
— Tetsürtem temang ayokba aser mezüngmeshia amshiba mapatem dena tetsürtem anema tashiyim amshiba mapatem ajak samatsütsü.
Tang tashi alinuk aika nung tetsürtem dak langa liaka, pei temeden magütsüi talenba nung ayuba angudang tetsür mulung tip matemer. Asen India Lima nunga tang tashi women Reservation 33 person parliament nung implement mesüteti dang lir. Item ajakji ajanga ano tetsürtemji talenba küboksa lir ta sayur. Iba talenba nungi salatsü atema taküm 2016 IWD omenji tetsür tebur tebendang makai ajak kasa temeden alitsüla ta asüba nukjidong nung ajemdaker amunger.
2016 Campaign theme, Pledge For Parity
Taküm tetsürtemi tayongzükba agutsübaji ya, tetsürtemi lokti nung, rongsen ketzüng nung,sobaliba nung,aser yimsüsüba menden nung tebur den kasa inyakteter, anungji tetsür tebur tebendang makai ajak kasa asütsüla ta yimyim agütsüba lir
Alinuk aika nung tetsürtem dak langa liaka la nem temeten magütsüba agi alima rajang kümdaktsür.

Tanü tetsürtem yimyim –
Q – So how do we want to celebrate International Women’s Day 2016 ?
—– We say by Pledging For Parity ! .

Tetsür tebur ajak kasadang, anungji la anema tashiyim agi Taküm raksatsüba anentsüla, la anema azütokshiba anentsüla,aser la kidang aser kima yimdong nung metsübui sadoksadoka lidaktsütsüla.
Tetsürtemi ajemalua Tsüngrem akümtsübua pei sempet yari mapa tajung inyakba agi asen alima nem tajangzük agütsüba den asenoki Teyanglur Tsüngrem tushidi ni… ta ayongzüker. Tsüngremi iba ocet azünger ajak moajangma.