Interpol tir China nung pua lir

Beijing, Mongputeni/October 6 (Agencies): Interpol tir Meng Hongwei anema ken o benoka aliba nung ken o ashishitsü asoshi pa China nung sota lir, ta Küptoknü media sangdong ka ajanga metetdaktsü.
Aishi küm 64 tain Meng ya China nunger rongnungi mezüngbuba France nung amendaker aliba international law enforcement agency headquarter tekolakba lir aser pa taoba hopta China tongli discipline authorities-i ken o ashishitsü asoshi anir ao, ta Hong Kong nung amendaker aliba South China Morning Post sangdong ka ajanga metetdaktsü.
Ajisüaka pa kechi ken o nung aija apu ajibo tang tashi mejangja.
Meng shibai China Ministry of Public Security, vice-minister mapa dena bena lir pa anema China nung ken o benoka asadangdar, ta pa kinungtsüi French police dang pa samaba osang metetdaktsüba sülen ken o mejangjai aliba mapang ka nung Post ajanga iba osang metetdaktsü.
Rogonü Meng kinungtsüi pa samaba osang agütsüba sülen French police-i ken o bushisüngdang tenzükogo.
Interpol koba Lyon nung amendaka lir, parnoki Rogonü ashiba agi, parnoki Meng samaba osang jangjaa lir aser iba ya France aser China nung iba dak sendaka aliba ketdangsertem ken o lir, ta ashi.
France nungi osang ajanga ashiba agi, Meng ya tatemsa France nungi Rongjui/September 29 nü angu.
Tang tashi nung China public security ministry mesera foreign ministry-i kecha shia mali.
China supervision law kübok temulung melemi bilemba kibong ka nem nisung ka mapu tsüngda ghonda 24 lia osang agütsür, saka bushisüngdang nung timtem adoktsü ta bilemba ken o nungbo iba osang ya magütsür. Kasaji Meng kinungtsü nema osang kecha magütsü.