Intl. Football Friendly asaya nung India-i Cambodia akok

Phnom Penh, March 22 (Agencies): Bodhbarnü Olympic Stadium nung FIFA international football friendly, India aser Cambodia na asayaba nung India-i goal 3-2 agi kokogo.
Asaya tenzüker mezüngbuba tesadang nung India nung asayar Sunil Chhetri-i minute 36 buba nung mezüngbuba goal agüja liasü, saka goal agütsür minute ka tsüngda nung Cambodia nunger asayar Khuon Laboravy goal agüja asaya mezüngbuba shilem 1-1 nung tembang.
Asaya tanabuba shilem nung India nunger asayartemi maneni kanga junga asayaa goal ana tashi yok. Minute 50 buba nung Jackichand Singh-i ball kanga junga belenshia alur agütsüba Substitutes Jeje Lalpekhlua-i agizüka goal agütsü. Iba sülen maneni minute 54 buba nung Sandesh Jhinghan-i India nunger asoshi goal tasembuba agüja liasü. aji saka Combodia nungeria Chan Vathanaka ajanga minute 62 buba nung goal ka agüja asaya tatemi goal 3-2 nung tembang.
Taoba mapang nung India aser Combodia na tsüngda asayaba nung India-i goal 6-0 agi koka liasü.
India March 28 nü Myanmar den AFC Asian Cup qualifier asayatsü asoshi renemshidar.