INX Media ochimashi nung P Chidambaram-i shilem agia lir: ED

New Delhi, August 28 (Agencies): Enforcement Directorate (ED)-i Congress lenir aser taoba mapang Union finance minister, P Chidambaram anema inyaker, ta aitsüba dak sendakba nung Bodhbarnü ED-i Supreme Court (SC) dang, ED-i Chidambaram anema meinyaker, ajisüaka INX Media ochimashi nung pai shilem agia lir, ta metetdaktsü.
Chidambaram-i agütsüba temepishiba ken o ana Justices R Banumathi aser AS Bopanna nati akümba bench-i angadangba mapang nung ED-i, Chidambaram-i INX Media ochimashi nung shilem agia lir, ta metetdaktsü.
ED-i ashiba otem angadangba sülen Supreme Court-i Chidambaram maputsü atema pa nem Brihostibarnü tashi ‘interim protection’ agütsütsü lemtet.
ED tenüng nung jembidang Solicitor General, Tushar Mehta-i, senotsü ochimeshii amshiogo ta kuli sayutsüsa CBI ket nung kuli lir, aser maneni ochimashi inyakdar ta ED-i court nung kuli agütsütettsü, ta ashi.
Tang ama mapang ka nung iba ken o nung Supreme Court tiyongtsüi maitdaktsüner, ta mepishia ED-i Supreme Court dang ED-i Chidambaram apuba menokdangdaktsüner, ta ashi.
Mehta-isa, Chidambaram apubaji pa mezüngmeshitsü atema masü, ajisüaka senotsü nung ochimashi nokdangtsü atema lir, ta metetdaktsü.
Brihostibarnüa 11:30 ako nungi SC-i maneni ED ken o angadangtsü.
Mongolbarnü Chidambaram’er kibongi sangdong ka ajanga, sorkari yimtenren nung mangyangtsü atema inyaker; Chidambaram tenüng menüktsütsü aser mezüngmeshitsü nükjidong nung sorkari inyaker, ta aija liasü.
Hombarnüa Chidambaram’er jabaso Karti, “Onoki sorkar dang onoki mimshiba bank account ka kuli sayutsü, mimshiba kiojen ka kuli mesüra shell company aliba kuli sayutsü jazüker,” ta jembia liasü.