Inyakyim melenshiang, kasa onük dang tejembi: Shiv Sena-i PM ajungshi

Mumbai, Tsüklai/February 18 (Agencies): Ato Kilonser Narendra Modi aija Shiv Sena-i Mongolbarnü, Centre nung BJP-i aniba sorkari Article 370 aginba aser Citizenship Amendment Act (CAA) benokba ajanga yimden yimsüsüba tsütsü tajangzük angutsü asoshi inyaktsü melena terenlok mapa dak rangloker inyaktsüla ta ashi.
Saamana osang kaket nung taoba mapang BJP den sendakteper aliba party-isa, Deobarnü Modi-i Varanasi nung citizenship law aser Article 370 dak sendakba nung tenongshiba agika ajangshiaka sorkari telemtetba memelenshitsü ta ashiba ashishia telemtetba melenshitsü asoshi shibai na nongshir, ta asüngdang.
Delhi nung BJP pur tamakok anguba ajanga PM Modi inyakyim melenshitsü nüngdakba sayur. Maneni teti kasa onük jembiba ji nüburtemi teka maa agizüktsü akok, saka vote-bo tangaleniang aotsü, koba Delhi Assembly elections nung jangja jangja nguogo. Varanasi (Modi indang Lok Sabha constituency) nung kasa tamakok ngura nai kechi inyaktsü?” ta parnoki asüngdang.
Uddhav Thackeray-i aniba party-i ashiba agi, “Ato Kilonser Minister Modi-i Varanasi nung, sorkari CAA benokba aser Kashmir nungi Article 370 aginba memelenshitsü ta sangdongogo. Tetsükdaktsü aser tenongshiba kechi koma ka aliyonga ozü sorkar akang akanga nokdaka lir’.. PM Modi aser home minister Amit Shah nati ojembiba shia iba onük ya jembir (Delhi election). Iba ya BJP pur nüboyimba onük liasü saka nüburtemi magizük. Tang PM-i Varanasi nunga kasa onük jembiogo.. CAA aser Article 370 dak sendakba nung Modi shibai nongshir? Pai iba ya jangjashitsüla.”
Jammu and Kashmir nungi special status agintsü asoshi Sena puri pusemogo, saka tang parnoki Modi srokar aija, iba telemtetba agiba sülen kechi temelenshi adok, ta asüngdang. Kashmiri Pandits tem Valley-i meyipa aru maru ta asüngdangba mapang Modi-i, sorkari telemtetba agir aliba memelenshitsü ta dang ashir.
“Telemtetba melenshiang ta ashir masü saka nü o meyipshi tesü. Nai Kashmiri Pandits tem kidangi meyipa anir arutsü ta nangzükogo, aser ano shibai Pakistan-i atsünger aliba Kashmir meyipa agitsü nangzük?” ta parnoki asüngdangba den sorkari Kashmir nung industry aser shishilembaba tapu balala bener arutsütsü nangzükogo, ta ashi.
CAA dak sendakba nung Sena-i, nüburtemi ken o mejangjai aliba sorkari jangjatsütsüla aser ken o bentettsüla, ta ashi.