IOC-i India nem asayamung ayongtsü tenokdangba agütsü

New Delhi, Tsüklai/February 23 (Agencies): International Olympic Committee (IOC)-i tarutsü nung Olympic dak sendakba nung asayamung kecha host asütsü atema bid mesüdaktsütsü India nem tenokdangba agütsüogo. Shooting World Cup nung shilem agitsü atema Pakistan nunger shooter ana aser coach nem visa magütsüba sülen tang iba tenokdangba ya agütsüogo.
Iba tenokdangba ajanga India-i 2026 Youth Olympic Games, 2030 Asian Games aser 2032 Summer Olympics ayongzüka amungtsü atema imlaa aliba dak kongshitsü akok.
Ajisüaka IOC-i Indian Olympic Association nem shidi ka ajanga lenmang kabo lapoktsüogo. Iba tenokdangba ya India sorkari Olympic Charter dak ajemdaker asaya ajak nung asayartem shilem agidaktsütsü ta tenangzükba ka jangja magütsü tashi benoka atatsü.
Kasa mapang nung India-i 2020 shooting World Cup host asütsü aliba maongka samatsüakok.
World Olympic body-i National Rifle Association of India (NRAI) nem lenmang kar nungbo tiatok agütsüogo. IOC-i ISSF (world shooting body) dang iba asayamung nungi Olympic quota 16 aliba nungi ana dang agintsü asoshi tetuyuba agütsüogo. Iba quota ana ya tebur 25m rapid fire pistol lir kong Pakistan nunger shooter tem shilem agitsü liasü. Brehostibarnü IOC-i Cup nungi India nunger quota 16 prongla agintsü akok ta tsübua liasü, koba ajanga Tokyo Olympics atema India nunger shooter tem dak kongshitsü.
Asayamung kar nung India nunger asayartem Pakistan nunger den asayatsüsa kümra IOC-i jenjang tesashi agiba ajanga international asayamung nung India nunger asayartem dak kongshitsü akok.
International Shooting Sport Federation (ISSF)-i Tokyo Games matong tsüngda 2020 küm Delhi nung ISSF World Cup ka ayonga aliba ya agintsü asoshi jenjang agidar.
“Tarutsü nung iba amala mesükba tensa majurutsü atema ISSF-i India nung asayamung ayongertem dang nungi tezüluba nung asayartem bendanga mamshitsü tenangzükba ka meshitsü,” ta ISSF-i Hokolbarnü sangdong ka ajanga metetdaktsü.
India sorkari Pakistan nunger shooter Muhammad Khalil Akhtar aser Ghulam Mustafa Bashir, aser coach-cum manager Razi Ahmed nem visa magütsütsü asoshi telemtetba agiba sülen Indian sports authority-i iba temerenshi angutsü imlaa liasü.
2018 küm November ita New Delhi nung Women’s World Championship mapang Kosovo nungi women’s boxing team shilem magidaktsüba sülen IOC tezüdanga liasü. India-i Kosovo ya linük ka ama magizüker.
Shooting World Cup ya Tokyo Olympic atema qualification tetoktepba ka lir, kong iba asayamung nung indang indanga shilem agitsü asoshi linük ajaki pei tata quota aazüker. IOC-i, asayar nem visa magütsüba ya Olympic charter nung fundamental principles nung aibelenba ama züngshir.
IOC nung India nunger züngsem Randhir Singh-i ashiba agi, India asoshi lenmang ajak agi sorkari IOC nem tezüluba nung asayartem ajak kasa benshia shilem agidaktsütsü ta tenangzükba ka agütsütsüla.
IOA secretary general, Rajeev Mehta-i ashiba agi, IOA-i sorkar dang takaratiba nung tenangzükba tem meshitsü. “Sorkari anogo 15 nungi 20 tsüngda tenangzükba ka magütsüra IOC-i onok dang shidi tanga ka zülutsü. Onoki multi-sport event ayonga mungner saka IOC-i iba asoshi jembishinü ajak nokdanga lir. Iba ken o ya takaraba nung bentettsüla,” ta pai ashi.