IOC nung züngsemtsü asoshi Nita Ambani tenüng benoker

Bern, June 03 (Agencies): India nunger billionaire, Mukesh Ambani kinüngtsü, Nita Ambani International Olympic Committee (IOC) nung züngsemtsü asoshi tenüng benokogo.

Brazil kübok Rio de Janeiro nung taküm August ita 2-4 nü tashi agitsü ayongba 129 buba IOC Session nung shimra, Nita ya IOC nung züngsemtsü jenjang angur mezüngbuba India tsür akümtsü.

Switzerland nung tesepti tentetba IOC ya Olympic Movement nung tematiba tentet lir aser iba tenteti Summer aser Winter Olympics den külemi, Paralyimpics-a ayonga agir.

“Reliance Foundation tentetla aser mendenbula, Nita Ambani IOC nung züngsem asütsü asoshi tenüng benokogo,” ta IOC telokia osang jangjashitsü.

IOC nung züngsemtsü asoshi tenüng benoker mezüngbuba India tsür akümla, Nita-i IOC züngsem akümtsü jenjang asangsang nung ajangzükra, lai la arishi küm 70 tain tashi iba mendenji abentsü.

Teküboktiba jenjang nung saisapongtsü jenjang tajungba kümdaktsütsü maparen kanga meranga inyakba nüngtem nung Nita tenüng ya IOC nung züngsemtsü asoshi benokba osang jangjaogo.

“Saisapongba ajanga lanurtem taküm jenjang tajungba kümdaktsür, lokti tentet balala tali lungjemdaktsür aser sobaliba balala benshir sentaktepshitsür. IOC-i par züngsem akümtsü maongka tulu kü nem agütsüba atema IOC dang pelaba metetdaktsür,” ta Nita-ia metetdaktsü.