iOS amshirtem asoshi BHIM App sayaogo

February 11, 2017 (Agencies): India linük nung shidi sen mamshitsü sentong nung ajemdaker digital oset balala amshia shishilembaba aser senotsü agütsüyaba tali ajungkettsü nükjidong nung iOS amshirtem asoshi Bharat Interface for Money (BHIM) indang App sayaogo. Iba App ya sorkari yanglu aser iba ajanga tekaraba aser ashikülaker nungi kümzüka senotsü tsüdateper.
“Talangka nungi kanga yongya ataba, Apple smartphone amshirtemi asoshi BHIM App download süa amshitettsü. Iba App ya AppStore nung angutsü,” ta Niti Aayog ajanga Twitter nung sangdong.
Android phone amshirtem asoshi BHIM ya 2016 küm December ita 30 nung, India Ato Kilonser, Narendra Modi-i sayatsü.
BHIM nung UPI aser USSD amshia sen zübazüba menoktsü akoker. India nung BHIM App ya crore ka dak tali download süogo, ta IT Minister, Ravi Shankar Prasad-i taoba ita metetdaktsü.
Anogo ishika nung iba BHIM App aika download asüba ajanga India nung ‘digital payment’ aser shidi sen mamshii senotsü tsüdatepba nung terenlok aliba sayur, ta IT minister-isa shisem.
India nung demonetisation asüba sülen, mobile wallet, USSD aser RuPay amala sen-ostü tsüdatepba application amshir aika aküm.
November 8 tashi nung USSD amshir anogo nung 97 tang liasü saka December 25 nung iba app amshir 5,078 kümogo, ta sorkar ajanga metetdaktsü.
Iba ama November 8 tashi nung UPI amshir anogo nung 3,721 liasü aser December 25 tashi nung iba app amshir 53,648 aküm.