IPFT nungi lenirtem Centre nung tongtibang nisungtem majuruteter

Agartala, Aenjeti 5 (Agencies): New Delhi nung anogo ana tashi oa mongzüka ataba sülena, N.C. Debbarma-i aniba Indigenous Peoples Front of Tripura (IPFT) pur sorkar ketdangser tongtibang ka den danga ajurutepa senden mekatet.
BJP lenir aser okatsür Arun Kanti Bhowmik-i ashiba agi, IPTF pur aser Centre nung lenirtem tsüngda Yangtepnü (Brehostibar) kecha senden maka. “Ni iba amala senden ka akaba kecha jangjaa mali,” ta Bhowmik-i party otongdar Mrinal Kanti Deb densema lia ashi.
IPFT general secretary Mewar Kumar Jamatia-i ashiba agi, parnoki North East Democratic Alliance (Neda) mendenbuba Himanta Biswa Sarma den ajurutepogo. “Pa den tanabenbuba senden ka kaaogo. Onok pa den ano tesembenbuba ajuruteptsü imlar,” ta Jamatia-i ashi.
Sarma ya IPFT pur aser Centre na tsüngda Tripura lisopur atema state balaka; Twipraland akhangba dak sendakba nung senden akaba mapang nung apulatsür ka ama tongtibang shilem agir. State nung BJP lenir Jishnu Kishore Debbarman densema iba ken o jembishinü nung shilem agia arudar aser parnok lemtepba onük nung Tripura nung taruba election nung party ana ya külemi longjemer tokteptsüba dena süoka jembia arudar.
IPFT lenirtemi ashiba agi, parnoki Union home minister Rajnath Singh den ajuruteptsü imlar. Kasa mapang nung parnok Tripura nungi maposu tsüngdabo Ato Kilonser Narendra Modi aser tanga tongtibang lenirtem den ajuruteptsü, ta ashi.