IPFT puri Cabinet minister ka akhanger

Agartala, Rongjui/September 19 (Agencies): Indigenous People’s Front of Tripura (IPFT) puri Cabinet minister menden talila ka asoshi khangogo. Parnok ya Tripura sorkar kümtetba party rongnung ka lir.
IPFT tir aser state revenue minister Narendra Chandra Debbarma-i iba osang ya media nem metetdakja liasü.
Pai ashiba agi, “IPTF lenirtemi BJP working president J P Nadda den Delhi nung ajurutepogo aser onoki pa dang onok takhangba metetdaktsüogo.”
Parnokisa, Cabinet nung minister menden talila ka asoshi khanga J P Nadda dangi shiti ka züluogo.
Tang Tripura cabinet nung menden pezü tazüng lir.
N C Debbarma-i osangbenertem den sensaksemba mapang ashiba agi, taoba küm sorkar kümtetba mapang Cabinet menden 12 liasü
Minister teku Cabinet nung züngoksemogo aser item rongnung BJP tenet aser IPTF ana dang lir.
Ita asem tejakdang health minister Sudip Roy Barman Cabinet nungi aginogo aser tang Cabinet minister ti dang lir. Anungji menden pezü tazüng lir aser IPTF pur nem kabosa agütsütsüla, ta Debbarma-i ashi.
Züngsem 60 agi kümtetba Tripura Assembly nung IPFT MLA ti aser BJP MLA 36 lir.
Sudip Roy Barman Cabinet jenjang nungi aginba sülen chief minister Biplab Kumar Deb-i Cabinet menden melenshitsü ta shiogo.
Iba mapang nung paisa Cabinet nung mapa inyakba apir nisung tasen anioktsü ta shia liasü. Ajisüaka cabinet nung minister tem menden kodang melenshitsü iba indangbo pai kecha mashi.
IPFT, tir N C Debbarma aser general secretary Mevar Kumar Jamatia na Cabinet nung lir.