IPFT puri CPI(M) party office rongtoktsü

Agartala, August 10 (Agencies): Kanga tang imlaa maliba tatalokba ka nung Indigenous Peoples Front of Tripura (IPFT) puri Khumulwng nung CPI (M) party pur office rongtoktsüogo. Parnoki motor cycles, gari aser lokti oset balala rongtoktsü. Iba lendong nung parnok 10 tashi yiruogo.
Osang ajanga ashiba agi, IPFT pusemertem rally ka atema Khumulwng nung yashi nikongtsütsü 3:30 shi nung adenshia liasü.
Iba sülen CPI(M) pusemertem aser parnok na tsüngda mangatettep adoka parnoki local communist party office rongtoktsü.
Office rongtoktsüba dak alaka parnoki motor cycle 28 aser gari ka rongtoktsü, kasa mapang nung parnoki iba tesem kanga mejungi raksatsü.
Iba tesem nung aliba nüburtem tetsübu nung iba tesem toktsür ajen. Iba tatalokba sülen minute 30 shi lir Radhapur aser Khumulwng police station nungi police tem oa tensa azüok. Parnok oa adongdangbo Motorcycle tarong tem den local CPI (M) party office mitsü kümer liasü.
Iba lendong dak sendakba nung IPFT General Secretary Mewar Kumar Jamatia dang pa tebilemba asüngdang dang pai ashiba agi, ITPF pusemer lanurtem joko lakadokogo aser matateter.
Pai ashiba agi, CPI (M) pusemer kari parnok senden akatsü renemer aliba tesem amak aser microphones, sabang, menden aser senden atema tanga osettem bendena aliba raksatsü.
“Onok pusemertem iba mapang nung ishika dang liasü aser CPM puri parnok ajabanga ayu. Iba sülen IPFT pusemertem aika sentep,” ta Mewar-i ashi.
Paisa ashiba agi, CPI(M) pusemertema parnok 30 nungi 40 tsüngda party office kima senteper liasü.
“IPFT pusemertem dak kanga mejungi azük aser parnok 4 mozüki nung lir. Maneni party office kima parnok paikaji adenshiba ajanga onok lanurtemi parnok amaktsüba adenshir asütsü akok ta bilem südi. Parnok mazüokteti parnoki motorcycle kar raksatsü, aser office dena raksatsü,” ta IPFT lenir-i ashi.
Iba tatalokba ajanga IPFT pur tatishitsü ka agütsür asü, ta asüngdang dang Mewar-i ashiba agi, par teloki iba tatalokba ya aitsür.
“Onoki makaka iba ya mataloktsü asü. Party anaprongla nung züngsemtemi yimjung nung alitsü merangtsüla,” ta pai ashi.
Kasa mapang nung CPI (M) pusemer parnok 8 anema local police station nung ken o ka benokogo aser iba anema CPI(M) puria ken o ka benokogo. Tatembangsa osang aruba tashi nung shinga apuba osang mali.
Iba tesem nung aonung nisung senzü senpong nokdanga lir.
Iba lendong nung yiruba CPI(M) pur züngsem ana GB Hospital nung temang anepaludar.