IPFT puri senden ka akatsü asoshi Centre dang akhang

Agartala, July 12 (Agencies): IPFT pur takhangba nung telangzüba kecha manguba sülen parnoki Centre dang state, IPFT aser Centre ta parnok-i state balaka akhangba dak sendakba nung senden ka ayongzüktsü asoshi asüngdangogo.
“Left party yimsüsüba kübok lisopurtem nem teyari kecha magütsür, anungji onoki state balaka akhanger. Onoki onok takhangba tali nenshitsü asoshi longkak aitba sentong ayongzüka agidar, anungji tang onoki Centre tang iba ken o lemteptsü asoshi ‘bipartite’ mesera ‘tripartite’ senden ka ayongzüktsü asoshi akhanger,” ta IPFT nung lenir kati ashi.
Parnok rongnung teshimtetba pur ishikati Governor Tathagata Roy ajurua Centre-i iba ken o reprangshitsü asoshi parnok takhangba tezüluba nung agütsüogo.
IPFT pusemertemi July 10 nü nungi tenzüka Barmura Hill Range kübok Khamting tesem nung mapang telatet ka makai longkak aitba sentong ka ayongzüka agidar. Parnoki National Highway aser train lenmang tem nokdanga lir.
National Highway (NH) ajanga state ya Assam ajanga linük nung tanugnba tesemtem den sendakteper. Iba longkak aitba sentong tenzükba sülen state nung train senzüsenpongba ajak anenogo.
Longkak aitba tesem tem nung security tali akangshiogo aser tang tashi nung lendong kecha ataloka mali, ta osang ajanga metetdaktsü.
IPFT puri DoNER Minister Jitendra Singh aser ano Prime Minister Office (PMO) nung Minister of State den May 17 nü New Delhi nung ajurutepa parnok takhangba, talisa Tipraland akhangba dak sendakba nung tezüluba nung takhangba ka agüja liasü.
“Onok takhangba dak sendakba nung o lemteptsü asoshi bipartite mesera tripartite senden ka akatsü asoshi khangogo. Centre-i onok takhangba molunga agizükra onoki mapang telatet ka makai lenmang aser train lemang mokdanga aliba agintsü akok,” ta paisa ashi.
CPM puri iba ken o dak sendakba nung BJP teloki IPFT pur nungita yarir ta aitsüogo, kechiyong parnok Jitendra Singh den ajurutepba sülen iba longkak aitba sentong akatsü asoshi anogo sangdonga liasü.
Ajisüaka BJP puri iba taitsüba ya anemogo aser parnoki ashiba agi, parnoki state lemdangtsü asoshi memolunger.