IPFT puri Tipraland ken o Rajnath den ajurutepa jembi

Agartala, November 06 (Agencies): Indigenous Peoples Front of Tripura (IPFT) puri state tasen ka kümtettsüba atema khanga arudar aser iba dak sendakba nung IPFT züngsem parnok tekoi Deobarnü Union Home Minister Rajnath Singh den ajurutepogo.
Osang agitepba mapang nung, IPFT tekolakba aser iba telok lenir NC Debbarma-i ashiba agi, Parnoki state balaka akhangba ken o lepshiogo. Parnok taoba mapang nung Centre sorkar dang parnok asoshi state balaka ka kümtettsütsü asoshi takhangba agütsüogo, aser iba nung ya July ita, MoS for Home Affairs Kiren Rijiju den ajurutepba densema lir.
Iba ken o dak sendakba nung state tasen ka kümtettsüba atema tekolak committee ka kümteta ken o asadangtsü, ta IPFT puri mepishiba nung Rajnath-i telangzüba agütsüba, NC Debbarma-i metetdaktsü. Ajisüaka minister-i iba ken o jembishinüba nung state sorkar kechi südir süaka dendaktsütsüla , ta ashi.
“Onoki parnok dang Tripura ya communist party kati yimsü asür aser parnoki onok takhangba nung kodanga memolungtsü, ta shiogo,” ta NC Debbarma-isa ashi. Paisa ashiba agi, minister-i state sorkar iba jembishinü nung tendakjang, ta ashiba o nungi pa tamendak dak memelenshi aser iba ajanga ano maneni jembishinü ka tamakok nung tembangogo.
MHA interlocutor aser Naga peace talks JIC chief, RN Ravi aser Ministry of Home Affairs Joint Secretary (NE), Satyendra Garg den senden ishika amenba sülen, IPFT lenirtem general secretary Mewar Kumar Jamatia-i anir Home Affairs Kiren Rijiju den tawa ajurutepogo.
Maneni IPFT lenirtemi Prime Minister’s Office (PMO), Minister of State Jitendra Singh dena Tipraland ken o jembishinütsü asoshi ajurutepogo.
Centre-i Section 240 (a) kübok Tripura nung autonomous state ka kümtettsüba ya melolungi arudar.