iPhone 6s, iPhone 6s Plus million 13 tashi yokshiogo

Washington, September 28 (Agencies): iPhone 6s aser iPhone 6s Plus sayar anogo 3 tashi nung million 13 dak timba yokshiba osang ka United States kübok California nung tentetba multinational company, Apple-i tanü Hombar nü metetdaktsüogo.

Par teloki iPhone tasen 2 ya teshimtet linük kar nung taoba Hokolbar nü sayaa liasü aser India nunga phone tasenji taruba October ita 16 nü sayatsü sentong renema lir.

Yaküm 2014 küma phone tasenba sayaba hopta nung iPhone 6 aser iPhone 6 Plus phone million 10 dak tema yoka otsü tasen yanglua liasü.

Phone tasen adoktsü osang tan September ita sangoktsüba sülen taoba Hokolbar nü mezüngsüa sayaba iPhone 6s phone tasen 2 ya Silver, Gold, Space Grey aser Rose Gold Aluminium sentzü nung adoktsüba osang jangjaogo.

Aji oda, taoba Hokolbar nü nungi tenzüka Australia, Canada, China, France, Germany, Hong Kong, Japan, New Zealand, Puerto Rico, Singapore, UK aser US nung alirtemibo iPhone tasen ya alizüka amshitsü tenzükogo.

“Tan iPhone 6s aser iPhone 6s Plus phone tasen sayaba sülen ozü teloki taoba mapang den phone kanga agi timba yokshia otsü tasen yangluogo,” ta Appel CEO, Tim Cook-ia metetdaktsü.

“Phone tasen alia benshirtemia 3D Touch aser Live Photos kanga jangratema amshiba osang angazükogo,” ta pai shisem.