iPhone 7 jenjang dang dalangba iPhone prangpong ayoktsü; Policetem kümdangshir

January 15, 2017 (Agencies): iPhone mesükba nung yanglua aliba 9mm double-barrel aketba prangpong US nung ayoktsü tenzükba sülen, iba prangpong Europe-i ozüng alema bener arutsü, ta ketdangsertemi osang sangdongba sülen Europe nung aliba policetem kanga kümdangshidar.
Tang tashi nung 12,000 dak tali order sür aliba “iPhone Gun” ya iPhone amai lir, saka button ka nung anemba ajanga iba prangpong tesashi kümdaktsür. Europe nung azütokshia nisung tepsetertemi iba prangpong ya anogo ka tsüngda nung Europe tonga bener arua amshitsü, ta nisung ajaki bilemer.
Iba oset jenjang ya pound 330 lir aser iPhone 7 jenjang tesadangka shi lir. Tawa kiralongrartemi Europe nung tesem balala amakba sülen kanga kümkümshir aliba Belgium police dang tekümdangtsü metetdakja lir.
Tejangja osang meliaka iba prangpong ya Europe nung lenmangtem nung yakta angutsü, ta osang ka Belgium police nem agüja lir.
“Iba prangpong ya mobile phone den kanga mesüktepba ajanga nisungi mebendangtettsü,” ta Belgium police-i ashi.
Minnesota nung aliba Ideal Conceal company-i yangluba prangpong ya US nung taruba hopta nungi ayoktsü.
“Smartphone ya ajak nung lir, anungji nü indang pistol tasenba ya tanü-asüng tensa den kanga putepa lir. Iba-i locked position nungbo ajitettsü kanga tasak,” ta iba prangpong yangluba company ajanga Facebook nung metetdaktsü.
Yaküm July ita, prangpong mesükba iPhone indang cover bener aliba passenger ka Essex nung Stansted Airport nung sota ayu.