iPhone tem küm asem tashi ang amshitettsü:Apple

New York, April 18 (Agencies) : US nung electronic oset yangluteter tetsüti Apple-i, “iPhone tem aser Apple watch ajak küm asem tashi dang amshitetsü aser AppleTV küm pezü tashi dang amshitettsü,” ta metetdaktsüogo.

Parnok meyong ‘lipoküm inyakyim’ tajungba küma melenshitsü metetdaktsüba mapang Apple-i parnok oset küm kwi junga amshitettsü, itemji rasaa ashi.

Forbes.com osang nung ashiba agi, iPhone kaji küm asem tashi dang amshitsü atema yanglur aser iba den saku Appli Inc-i yangluba Apple Watch den OS X operating systems tema küm asem dang amshitettsü. Ajisüaka AppleTV bo ita 12 tali amshiteta küm pezü amshitettsü.

“Nüburtemi amshiba sadangtsü asoshi onoki yangluba oset ajanga power koba tashi agir ibaji tama kanga junga asadanger,” ta Apple-i ashiba kasa osang ajanga ashi.

“Oset ajakji tamshiba dak keta lir. OS X aser tvOS na küm pezüzü amshitettsü aser iOS aser watchOS na küm asemsem amshitettsü ta mezüngsüa item osettem amshiba yimya asadangdang nguteta lir,” ta Apple Inc company-i ashi.

Anungji iba inyakyim metetba ajanga nüburtem pei aliba osettem kodang tashi amshir upgrade asütsü mesüra tasen agi melentsü ibaji jelia metetsü.

Tatishitsü agi iPhone 5S den mesüktepa yangluba, tawa sayaba iPhone SE ya küm asem atema iOS 9 tasenba nungi iOS küma upgrade sütettsü. iPhone 5S nungbo yamaji upgrade süa mamshitettsü.

Ajak liaka Apple-i parnoki yangluba hardware tejentem atema parnok meyong operating systems putepa kümdaktsütsü inyakyima tenzükogo.