IPL 2016: Pune teloki Dhoni nübo sen crore 12.5 agi alizük

Mumbai, December 15 (Agencies): India kübok Mumbai yimti nung tanü, Mongolbar nü agiba Indian Premier League (IPL) cricket asayamong asayar nübo alizüktsü sentong nung India’er One Day International (ODI) captain, Mahendra Singh Dhoni aser külem Chennai Super Kings asayar, Suresh Raina na sen timba agi nübo alizüker asayar kümogo.
Sanjiv Goenka-i Pune nung tentetba New Rising teloki Dhoni aser Keshav Basal-i Rajkot nung tentetba Intex teloki Raina nübo sen crore 12.5 agi alizüka tena sen timba agi nübo alizüker asayar aküm.
Pune teloki maneni Ajinkya Rahane nüboa sen crore 9.5 agi alizük aser Rajkot telokia Ravindra Jadeja nübo sako jenjang agüja alizüka liasü.
Taoba mapang, 2013 küm benokba spot-fixing aser betting ken o nung ajemdaker Chennai Super Kings o Rajasthan Royals telok na ISL asayamong nung shilem magidaktsütsü lemteta New Rising aser Intex telok na tan asensa anioksemba yong tanü Players Draft sentongji agitsüsa aküm.
Ano, Pune teloki sen crore 7.5 agi nübo alizükba sülen Ravinchandran Ashwin-i maneni Dhoni den kasa telok nung shilem agitsü jenjang nguogo.
Rajkot telokia sen crore 7.5 agisa nübo alizüka, New Zealand nunger Brendon McCullum tanü nübo alizüker bendanger asayar mezüngbuba aküm.
Tanü sentong nung Pune teloki sen timba agi nübo alizüker asayar 5 rong nung Dhoni, Rahane, Aswin, Steve Smith aser Faf du Plessis nunger densema lir aser Rajkot telok nung Raina, Jadeja, McCullum, James Faulkner, Dwayne Bravo nunger densemogo.