IPL 2016: RCB aser SRH na tanü final asayatsü

Bangalore, May 28 (Agencies): 2016 Indian Premier League (IPL) cricket asayamong nung telok tajungtiba ana – Royal Challengers Bangalore (RCB) aser Sunrisers Hyderabad (SRH) asayartemi pei tajungtiba agüja asayaba sülen tan mezüngsüa IPL asayamong takok marok asüng, Deobar nü agizüktsü terenemshitsü agitsü tenzüka lir.
Tan asayamong nung tanga teloktemi mekoktetsüsa captain Virat Kohli-i aniba RCB teloki takok tulu ngua tan final asayatsü jenjang ngua lir.
Skipper David Warner-i aniba SRH telokia tanüngba telok madak takok ngua tan final-i ia lir.
Asüng final asaya nung arishi küm 27 tain Kohli-i par RCB telok asoshi takok tulu ngua asayatsü ta alimai yongyatsü tenzüka lir.
Kohli-i tan asayamong nung hundreds 4 aser fifties 6 yangluba densema, inning 15 nung runs 919 tashi yanglua kangasa junga shilem agiba osang bushiteta lir.
Külem asayar, South Africa nunger AB de Villiers-ia Kohli den yaritepa, par RCB telok nem takok ngudaktsütsü asoshi renemshiba osang angazükogo.
Ano külen, Warner lenisüba kübok par SRH teloki peisasa pei madak temulung lemteta asayaba ajanga par telokia final asayaji akoktsü temulungtetba tulu ayutsü tenzükogo.
Qualifier 2 asaya nung shilem magitettsüsa akümsang, Bangladesh nunger Mustafizur Rahman-i kanga jung bowling asüba ajanga RCB batsman-tem – Kohli, Shane Watson aser Chris Gayle nunger wicket ayong ayonga laodakja par SRH teloki final asayaji kokadoktsü akok.
Külem asayar, Yuvraj Singh-ia asüng junga shilem agiba ajanga par SRH teloki 2016 IPL takok marok asangsang nung agizüktsüa jenjang tajung angutsü.
RCB aser SRH telok na tsüngda final asaya ya Mumbai kübok Wankhede Stadium nung asüng aonung 8 ako nungi tenzüka asayatsü.