IPL Rongchii 7nü nungi tenzüka asayatsü

New Delhi, Aenjeti 22 (Agencies): 11buba Indian Premier League (IPL) asayamung Rongchii (April) 7 nungi Monupii 27 tashi asayatsü. Iba asayamung tetenzük aser tatembuba asaya Mumbai nung asayatsü, ta Tentonü IPL Governing Council (GC) sangdong ka ajang metetdaktsü.
Iba asayamung lapokba sentong Rongchii (April) 6 nü agitsü.
Star Sports puri mepishiba agizüka Indian Premier League (IPL) Governing Council (GC)-i asaya mapang melenshitsü atema temelaba agütsüogo. Taoba mapang aongnung 8:00 ako nungi tenzüka asayaa aliba 7:00 ako nungi tenzüktsü, aser 4:00 ako melana 5.30 ako nungi asaya tenzüktsü.
“Star Sports puri mapang melenshitsü atema mepishia liasü. Ibaji Governing Council (GC)-i agizükogo. Asaya aonung 8 ako nungi tenzükra kanga menuadoker asür,” ta IPL mendenbuba Rajeev Shukla-i GC senden tembangba sülen ashi.
Iba senden nung Kings XI Punjab team pur home game Mohali nung pezüben asayatsü aser Indore nung asemben asayatsü ta lemtet. Rajasthan Royals team küm ana tashi IPL nung shilem magidaktsüi nokdangba sülen, taküm nungi tenzüka shilem agitsü asoshi Rajasthan High Court-i Aenjeti (January) 24 nung telemtetba agütsütsüba sülen jangjatsü.
Iba asayamung nung India nunger asayar 360 densema asayar ajak agi 578 Aenjeti 27 aser 28 nü Bangalore nung auction asütsü.