IPR Addl. Director, Dominic mang remogo

Kohima, August 25 (TYO): Hokolbarnü Information & Public Relations department Director-i anir ketdangsertem densema temeimer aser medemer noklang aika adenshia Information & Public Relations Additional Director, asür Dominic Yazokie nem tatembangbuba akhüm agüja Vidima yimdak mang remtsüogo.
Tanü asüpila sentongji Holy Spirit Church, Vidima nung ayonga agia liasü.
Parliamentary Secretary Nagaland, Er. Vikho Yoshu-i asür Dominic’er yim, Kigwema nüburtem tenüng nung jembidang pai, asür Dominic ya shisa akaba nisung ka liasü, aser pai mapang ajak nung nüburtem aser lokti yaritsü melunga liasü, ta metetdaktsü.
Paisa, “Kü tembar tajungtiba aser shisalen sayur ka alima nungi pilaba ajanga tapok tulu apatsü,” ta shisem.
Asüpila sentong nungsa IPR Director, Limawati Ao-i, asür, Dominic ya mapa tajet aser ketdangser tajung ka liasü aser lanur ketdangsertem atema tebu ka ama liasü, ta ashi.
Department nung ketdangsertem aser staff tem tenüng nung Limawati-i mangyimer kibong den mangyim lemsatep, aser asür tanela tatem makai tesünep nung anisüngzükdakjang ta sarasademtsür, ta metetdaktsü.
Sentong nungsa Retired Director HE, Norbert Noraho, DPRO Dimapur, Lolano Patton, Vice President ACU, Kevituonyu Simon, Catechist St. Michael Church Kigwema, kinüngertem tenüng nung Vimetha Vincent nunger densema nisung aikati jembia liasü.
Ano Nagaland Angh, Chief Minister Nagaland aser Bishop Nagaland nunger nungi aruba osanga zünga metetdaktsü.
Asür Dominic Yazokie ya mapang tatsüka shiranga aruba sülen August 25, 2017 nü Bethesda Hospital nung asü.
Pa 1985 küm November ita nungi PRO Delhi ama IPR Department nung inyak aser küm 18 jungnüa sorkar aser nüburtem junga tenzüka aru. Directorate-i aruba sülen pai menden balala aika nung inyak, aser iba nungji PRO to Governor of Nagaland aser CM office nung Nodal officer densema lir.
Pa kinüngtsü den jabaso asem aser jala ana den semchir trok yutsür alima nungi pilaogo.