IPR Department-i Press Club-tem nem teyari sen agütsür

Nagaland nung tentetba Press Club-tem nem teyari sen agütsüba sülen Nagaland Parliamentary Secretary, IPR, Khekaho Assumi-i osangbener den sensak asemba noksa ka yangi angur. (Kohima, April 28)

Dimapur, April 28 (TYO): Nagaland sorkar kübok Information & Public Relations (IPR) Department-i ayonger külen IPR Parliamentary Secretary, Khekaho Assumi’er office kilung nung sentong tajung ka agia, Kohima, Dimapur aser Mokokchung nung tentetba Press Club (PC) shia nem senotsü teyari tanü, Brihostibar nü agütsüogo.
“Tanü sentong nung shilem agiba atema PC ajunga dang pelaba lemsateper. Sorkar aser osangbener na tsüngda tesendaktep tajung aser amalitepbaren aliba ajanga mangatettep aser tetsükdakba ajunga tekaratiba nung bentettettsü. Anungji, osangbenertemi pei khuret, tangatetba aser shisatsü tajung menungnangi lemsateptsü ajungshir,” ta Khekaho-i tanü ayongzük.
“Press Accreditation den sentakba temzüng ozüng latettsü, Journalists’ Welfare Fund aser osangbenertem taküm lendong balala nungi kümzüka ayutsü nunger densema, osangbener den sentakba mapatong balala IRS department-i ketdangsüa tebenshidak lir aser kasaji tekaratiba nung mapa küma inyaktsütsü alizüng yua lir,” ta Secretary, IPR, T. Ao, IAS-ia tanü sentong nung metetdaktsü.
Tanü sentong anisang, Additional Director, IPR, Limawati Ao-ia tan agütsüba teyari sen den sentakba mapatong jangjashitsüba den külemi, osangbentsü den sentakba maparen ajunga IPR-i ketdang asüba yong par department-i Nagaland nung tentetba osangbener telok ajunga anepalutsü aser nüngdakba teyari agütsütsü tenangzükba olen ka lemsatepa liasü.