IPR Director-i Ctn nung APRO office semdang

Mokokchung, Nov.09 (TYO): Nov. 4, 2017 nü Information and Public Relations (IPR) Director, Limawati Ao-i Assistant Public Relations Officer office (A.P.R.O) Changtongya semdang.
Sentong nung jembidang Limawati-i staff tem dang mapa kecha nunga tamakok maludaktsüi nendaka inyaktsü ajungshi. Paisa staff tem dang tamalen A.P.R.O office, Changtongya nung inyakertemi tenüng tajung bener arutsüba ama kasaji inyaktsü ajungshi.
Iba sülen pai office nung section ajak semdanga liasü.  Paisa A.P.R.O nem laptop ka agütsüba den külemi technical staff temi ajangshiba timtem balala atema inyaktsü aser nüngdakba osettem tekaratiba nung agütsütsü, ta nangzük.
Pai L.D.A staff tem danga computer basic knowledge angazüktsü ajungshiba den külemi peipei posting tesem nung staff tem tsüngda amalitepa inyaktsü ayongzük.
Iba sentong ya A.P.R.O Changtongya, Meyisusu Jamir leniba nung agi, aser paisa lokti pelaa agizükba o jembiba den IPR Director-i Department atema bilemja A.P.R.O office, semdangba atema pelaba lemsatep.