IPR director-i training nung shilem agirtem ajungshi

Dimapur, Mongputeni/October 22 (TYO): Information & Public Relations (IPR) Department indang technician tem nem live sound management dak sendakba nung anogo ana training agütsüba October 22 nü tembangogo. Iba training sentong nung Managing Director, Pheto Music & Film Academy, Dimapur, Kashito Kiba shisalen agütsür liasü.

Training shibangba sentong nung o jembiba mapang Director, IPR, Er. Z. Tokishe Sema-i, training nung shilem agirtem dang pei mapa nung tajungtiba agüja tenzüktsü ajungshiba den state employees itasen kija agi state sorkar budget shilem 80 shi ajunger aser workforce tajungtiba nung achaayanga amshitsü atema talenba tesashi benokogo, ta ashi. Paisa, sorkar mapa nung züngoksemtetba atema parnok ya aika rongnungi tia takartem lir ta ashi. Maneni  Director-i, parnok nem tangazükba agütsüba ya takok tashi tajungtiba nung amshitsü aser state nung jenjang ajak nung department-i agütsüba service ajungkettsütsü ajungshi.

Training nung shilem agirtem nem live sound system configuration, external analogue processor, systems corrections aser configuration aser stage gears achayangba yim aser technical handling dak sendakba nung tangazükba agütsü. Training takok nung tembangba sülen Director, IPR-i training nung shilem agirtem nem kuli kaket agüja liasü.