IPR-i staff tem den tepila sentong agi

Dimapur, Metsüremi (March) 14 (TYO): Metsüremi (March) 14, 2018 nü IPR Citadel, Kohima nung Nungshiwati Ao, Rtd. Registrar, Haokhothung, Rtd. Translator, I. Mar, Rtd. Driver aser Bao, Rtd. Driver nunger den tepila sentong ka ayongzüka agi.
Sentong nung IPR Director, Limawati Ao-i o jembidang, mapa nungi anisüngzükba ketdangsertem den pai külemi inyaksema aruba indang lemsatep.
Parnok ajakji tenendak aser lemzükba mapa nung tamakok mongui inyakertem dang lir. Parnoki department asoshi mapa tajung inyakogo aser iba atema tenüngsang agütsür, ta Limawati-isa ashi.
“Nenok temang anema lia mapa kümsük tembanga inyaktetba atema Tsüngrem nem tenüngsang agüjang. Nü taküm nung küm kwi ali ta masü saka nai kümtem liyonga arudang nü taküm koma litet ta asüba jiang tongtipangba. Maneni nenok ajak azükarua aser arishia liang ta moatsür” ta IPR Director-isa metetdaktsü.
Sentong nung Retd Registrar, IPR, Nungshiwati Ao-i o jembidang, department-i ketdangsertem den tepila sentong tajung ayongzüka agiba atema pelaba ashi.
Temang anema lia küm 35 tashi mapa inyaktsü mapang moatsüba atema Tsüngrem nem tenüngsang agütsür, ta paisa shisem.
Nisung ajaki azüngtsü-zülutsü meteta lir aser sempettem keta lir, anungji pei lemzükba mapa nung nendaka aser mapang shitak amshia inyaktsüla, ta Nungshiwati-isa sentong nung adenertem ayongzük.
Sentong nung mendenji Additional Director Tokishe Z Sema liasü, Asst Director Setsatishu-i temoatsü meshia sarasadem, Neilhouzonuo Superintendent, Chumchano Translator aser Mukand Driver nungertem o tatsütsü jembi aser Ayimla o medemertemi ken ka aten.