IPR Parl. Secretary-i DPRO Wokha office semdang

Dimapur, August 22 (TYO) : August 20, 2015 nü Information & Public Relations (IPR) Parliamentary Secretary, Khekaho Assumi-i DPRO Office Wokha office semdang aser idakji aliba ketdangsertem aser staff den senden ka agi.
Senden nung staff temi Parliamentary Secretary dang parnok indang khurettem lemsatep aser item asoshi teyari meshi.
DPRO staff temi ashiba o tem angaba sülen Khekaho Assumi-i tan financial year nungsa parnok nem Computer sets, laptop, video camera, P.A equipments aser still-camera nungertem agütsütsü ta nangzük.
Paisa DPRO Office building-i aoba lenmang kanga mejungi aliba ngua iba timtem ya temaba ketdangeertem dangi abentsü ta ashi.
Nagaland sorkari P.A equipment alitsü atema department nem senotsü lemzüktsüba atema Khekaho-isa sorkar dang pelaba ashi aser pa ita ishika ka dang mesüra küm ka atema dang IPR Parliamentary Secretary inyakyonga, pa inyakba mapang takokba tashi mapa inyaktsü ta paisa nangzük.
Senden nung District Public Relations Officer, Wokha, Wilfred Murry-i Parliamentary Secretary dang pelaba metetdaktsü aser pa lenisüba kübok IPR nung terenlok jenti bener arutsü imlar ta shisem.