IPR Parliamentary Secy-i Mkg DPRO office semdang

Mokokchung, September 10 (TYO): Tanü Information & Public Relations, Parliamentary Secretary, Khekaho-i Mokokchung DPRO office semdangba mapang, “Iba Department ya tsünglanglen nungi temabai atutsü asoshi meranga inyaktsü,” ta ashi.
Iba asoshi mera agidar aser ya atangji nung ataloktsü atema department nung amalitepa inyaktsüla, ta paisa ashi.
Tanü pa DPRO Mokokchung ketdangsertem aser staff tem den senden mena shisalemsatepba mapang Khekaho-i, IPR Department-i longjemer inyakba ajanga dang taoba mapang ama Department tenüng ajungkettsüji takoktsü ka asütsü, ta ashi.
Paisa, “temulung lemtepa longjemer inyakba ajanga tuluka inyakteter,” ta ashi.
Parliamentary Secretary-i, state nung tesem tezülen department inyakyim junga metettsü asoshi pai state nung aliba IPR office ajak semdangtsü tenzükogo, ta metetdaktsü.
Department nung osang, photo aser public address section inyakyim dak sentakba nung Khekaho-i, “Mapang telemsa yur Department nung PA osettem jenjang ajungkettsütsü sentong lir. Department nung temelenshi tulu ka adokdaktsütsüji ni süoki ia agir,” ta ashi.
Mokokchung nung tang teyanglutak DPRO Office building dak sentakba nung Khekaho-i, iba building tekaraba nung tembanga renemtsü asoshi iba building atema sen lemzükja alibaji tekaraba nung agütsütsü ta ashi.
DPRO Office Mokokchung ketdangsertem aser staff tem kanga nendaka inyaktsüla ta ayongzüka Parliamentary Secretary-i, pai mapang shia district aser divisional level nung office tem ajungbena dang semdangtsü, ta ashi.
Khekaho-isa section balala nungi incharge tem dang office nung metokmeperi nüngdakbatem metetdakjang, ta shia liasü.
Tanü iba senden nungsa DPRO Mokokchung, Chuba Walling-i pela agizükba o jembidang Parliamentary Secretary-i mapang agütsüteta office ketdangser aser staff tem den shisalemsateptsü atema aruba atema pa dang pelapa lemsatepa liasü.