IPTL: Paes-i par Japan Warriors telok nem takok bener arutsü

New Delhi, December 10 (Agencies): Tang tasayadak International Premier Tennis League (IPTL) asayamong India nung asayatsü tenzükba anogo nung, tanü Brehostibar nü India nunger tennis asayar mongin, Leander Paes aser külem asayar, Hugues Herbert nati takok ngua par Japan Warriors telok nem takokba bener arutsüogo.
Paes o Herbert nati tanü points 24-21 ngua tebur doubles asaya akokba sülen par Warriors teloki UAE Royals telok madak takok ngua liasü.
Tan takok anguba ya Warriors teloki taoba asaya 5 tashi nung atonga tamakok ajuruba sülen tan mezüngsüa takok angur lir.
Tanü mezüngbuba asaya nung World No. 6, Ana Ivanovic-i points 6-2 ngua Kurumi Nara madak tetsür singles asaya koka par Royals telok points 1-0 agi temaba jenjang nung ajungkettsü.
Goran Ivansevic-ia points 6-4 agi Thomas Enqvist tebur singles asaya nung tsükdakja par Royal telok points 2-0 agi temaba jenjang kümdaktsü.
Ajisüaka, Paes o Herbert nati points 6-3 agi Tomas Berdych o Daniel Nestor na tebur doubles asaya nung tsükdakja par Warrior telok jenjang tajungba kümdaktsü.
Herbert-i maneni Berdych madak takok ngua asayaba yong par Warriors telok points 18-19 ngua jenjang tajungba aküm.
Tesülen, Herbert o Lucic nati points 6-2 ngua Kristina Mladenovic o Nestor na mixed doubles asaya nung tsükdakja par Warriors telok nem tanü takokba bener arutsü.