Iran alima nem lendong bener arutsür linük ta joko mezüngshitsü: Rouhani

Tehran, July 15 (Agencies): Alima tashi abenba linük lenirtem den nuclear tezüngzüktep takok ngua agibaji Iran asoshi yimtenren takokba ka lir ta Iran Tir, Hassan Rouhani-i tanü Bodbar nü metetdaktsüogo.

Iran-i alima tashi abenba linüktem den nuclear tezüngzüktep agiba sülenbo Iran ya alima nem lendong bener arutsütsü linük ta joko mezüngshitsü ta Rouhani-i par cabinet senden nung metetdaktsü.

“Iran-i alima tashi abenba linük lenirtem kübok iya parnok nem bendanga agütsü ta shiangai meshitettsü kechiyong tan agiba nuclear tezüngzüktepji ozüngi agizükba aser Iran asoshi yimtenren takokba ka lir,” ta pai ashi.

Britain, China, France, Russia aser US den külemi, Germany densemba P5+1 telok aser Iran nati küm 13 tejakeln nungi tenzüka jembitepa arur külen yashi, Mongolbar nütu nuclear tezüngzüktep tatem küma agiogo.

Tan tezüngzüktep agiba ajanga US, European Union (EU) aser United Nations (UN) nungeri Iran anema benokba tenokdangba sentongtem agientsü aser ibaji melena, Iran-ia par nuclear sentong taruba küm 10 shi anentsü lemteter lir.

“Telok ana tsüngda lenji otepba ajanga dang tezüngzüktep tajung agiteter aser yamaji inyakba ajanga Iran aser alima tashi abenba linüktem na tsüngda nuclear tezüngzüktep takok ngua agiogo,” ta Rouhani-i ashi.

Iran-i par linük anemba benokba tenokdangba sentongtem ajunga tekaratiba nung agientsü asoshi P5+1 telok dang metetdakja lir.