Iran anema benokba tenokdangba sentong ajunga agientsüla: Ayatollah

Tehran, September 03 (Agencies): Alima tashi abenba linüktemi Iran anema benokba tenokdangba sentong ajunga agientsü takhangba olen ka Iran’er Supreme Leader, Ayatollah Ali Khamenei-i tanü Brehostibar nü sangoktsüogo.

“Alima tashi abenba linüktemi nuclear tezüngzüktep agidang nangzükba ama, Iran anema benokba tenokdangba sentongtemji mapang tatsüka asoshi masü saka teti asoshi agientsüla,” ta Ayatollah-i metetdaktsü.

Paisa ashiba agi, par linük anema benokba tenokdangba sentongtemji magienra, par linüki alima tashi abenba linüktem den agiba nuclear tezüngzüktep magi akümtsü.

China, France, Russia, Britain aser United States den külemi, Germany densema P5+1 ta ajaba teloki Iran den tawa nuclear tezüngzüktep takok ngua agiba osang bushiteta lir.

Iba tezüngzüktep kübok Iran anema benokba tenokdangba sentongtem agienba melena Iran-ia par nuclear sentong taruba küm 10 tashi anentsü nangzüktep.

Ajisüaka, Iran anema benokba tenokdangba sentong teti asoshi masü saka mapang tatsüka atema dang agiena atatsü renemba osang ka US ketdangsertemi metetdaktsüba sülen Ayatollah-i tanü iba olenji metetdaktsü.