Iran anema benokba tenokdangbaren agientsüla: Lavrov

Moscow, July 09 (Agencies): United Nations (UN)-i Iran dang tongpang nung amshitsütsü osettsüset mayoktsü benokba tenokdangbaren tekaraba mapang nung agientsü takhangba onük ka Russia Foreign Minister, Sergei Lavrov-i tanü Brehostibar nü metetdaktsüogo.

Russia kübok Ufa yimti nung tanü ayongba BRICS senden tezülen, Russia Tir, Vladimir Putin-i Iran Tir, Hassan Rouhani den ajurutepba jakdang Lavrov-i iba olenji sangoktsü.

“Iran anema benokba par linük dang tongpang osettsüset mayoktsü tenokdangbaren tekaraba mapang nung agientsüla. Ano, Iran aser alima tashi abenba linük lenirtem na tsüngda amenba nuclear senden nung Iran-i agiba telemtetba agizüka kasaji nungitsü asoshi ozü Russia-i renema lir,” ta pai tanü osangbener den ajurutepdang metetdaktsü.

“Iran-i alima tashi abenba linüktem den nuclear senden amentsü lemtetdaktsütsü nükjidong nung UN Security Council-i Iran dang tongpang mayoktsü tenokdangbarenji benok. Ajisüaka, iba alizüngji ajangzüker joko mapang talangka arur anungji par linük anema benokba tongpang osettsüset mayoktsü tenokdangbarenji tekaraba mapang nung agientsüla,” ta Lavrov-i ashi.

Paisa ashiba agi, Iran anema benokba tenokdangbaji agienba ajanga Iran-i Islamic State (IS) aser par telok amala kiralongrartem madak takok ngua raratsüsa par linük nem nungdakba tongpang osettsüset agütsütettsü.

Iran-i nungitba sepai telok balalai kidangsüa aliba Iraq nung tentetba kiralongrar telok balala madak takok ngua tongpang raraba osanga bushiteta lir.

“Iran-i IS telok makdoktsü maparen bendanga agüja teinyakdak lir aser par linüki nungdaka aliba tongpang osettsüset tanaben ngutetba ajanga par mitkartemi kiralongrabaren madak takok tulu ngutettsü,” ta Lavrov-i metetdaktsü.

UN-i benokba tongpang osettsüset mayoktsü aser missile ayoktsü den sentakba tenokdangbaren agientsü asoshi Iran-ia onük benoka osang jangjaogo.