Iran aser India tenüng tajung tanaben lepa bener arutsüla : Modi

Tehran,  May 23, 2016 : Tehran nung India aser Iran na tsüngda ‘Retrospect & Prospect’ International senden tenzüknü India Ato Kilonser, Narendra Modi-i  Persia oshi nung meyipzüka züluba Panchatantra (Kalileh Wa-Dimneh) kaket sayatsüba noksa nung angur. 

Theran, May 23 (Agencies) : Akhidang India aser Iran na tsüngda tesentaktep tajung liasü, anungji iba tenüng tajung tanaben bener arutsü atema linük ana longjemtsüla, ta tanü Prime Minister Narendra Modi-i Iran nunger ayongzük.
Tehran nung osangbener senden ka nung Modi-i India aser Iran tsüngda akhidang tesentaktep indang onük jembia liasü.
Tanü India aser Iran tsüngda tenangzüktep kar agiba rongnung India nem Iran anüolentip tsütsü aliba Chabahar port amshitsü temelaba agütsüba dena lir.
Iba ya ajanga India-i Pakistan madeni Afghanistan aser Europe den sendakteptsü akok. Chabahar port renloktsü atema külemi yariteptsü tenangzükba den India, Afghanistan aser Iran tsüngda Transport & Transit Corridor Agreement nung India-i US nunger sen 500 million rizüngtsü indang tenangzükba dena lir.
“Iba tenangzüktep ajanga asen putiotsü nung otsü melenshitsü akok,” ta Prime Minister Narendra Modi-i tanü Chabahar port tenangzüktep agiba sülen ashi.
Prime Minister Modi aser Iran President Hassan Rouhani tsüngda olemtep alidang linük ana tsüngda tenangzükba agibatem rongnung aluminium plant ka lapoktsü aser India-i Afghanistan o Central Asia len senzütettsü atema railway lenmang ka yanglutsü densema lir.
Taoba India Prime Minister, Atal Bihari Vajpayee-i 2001 küm Iran semdangba sülen küm 15 lir Prime Minister Modi-i tan mezüng atema Iran semdanger.
Tanü Modi-isa Iranian Supreme Leader Ali Khamenei den ajurutep aser iba ya ajanga akhidang nungi India aser Iran tsüngda tesentaktep balaka aliba kuli sayuogo.