Iran aser Russia na senteper nuclear totzü yanglutsü

Tehran, February 26 (Agencies) : Honibarnü Iran’s Atomic Energy Organisation (AEOI)-i, Russia aser Iran na senteper nuclear totzü yanglutsü lemtetogo, ta metetdaktsü.
Russia den lungjemer nuclear totzü yanglutsü mezüng nangzüktepbaji 2015 küm Iran aser alima nung tashi tulutem adenshia nuclear inyakyim tsütsü olemtep akaba mapang renema ayu, ta AEOI nung tekoklaba Akbar Salehi-i osangbenertemi dang ashi.
“Iba inyakyim nung onoki Russia teyari nüngdaker,” ta Salehi-i ashi. Lungjemer inyaktsü atema inyakyim lateta lir aser ibaji mapa asoshi küm anabosa agitsü, ta pai shisem.
Salehi-i, Tehran aser Astana na senteper Kazakhstan dang yellow cake ton 950 alitsü lir, ta sangoktsü dang, iba mapaji Iran indang international nuclear inyakyim, ‘Joint Comprehensive Plan of Action (JCPOA)’ nung shilem ka lir, ta shisem
“Yellow cake inyakyimji küm asem tsüngda nung tenzüktsü,” ta pai ashi.
Küm ana nung Tehran-i yellow cake ton 650 anaben aitsü aser tanüngba ton 300 ji küm tasembuba nung atongtsü, ta paisa ashi.
JCPOA ya July 14, 2015 nü Iran, European Union aser P5+1 (United Nations Security Council nung teti atema züngsemtem: China, France, Russia, Britain, US plus Germany) tsüngda Vienna nung international tenangzüktep agiba lir.
Iba tenangzüktep dak ajemdaker Iran-i nuclear inyakyim kanga ajemogo.