Iran Foreign Minister, Zarif-i Lebanon Tir, Aoun den ajurutep

Beirut, November 08 (Agencies): Iran Foreign Minister, Javad Zarif-i Lebanon Tir tasenba, Michel Aoun den ajurutepba sülen Lebanon Tir tasenba den ajuruteper mezüngbuba Foreign Minister kümogo.
Tan Zarif-i Aoun den ajurutepba ajanga par Iran linüki Lebanon linük den sentakteptsüren nung Saudi Arabia linük den jenjang tajungba angutsü merangba kuli angur lir.
Christian tamangba yimsü benshir yimsüsür aser Iran sorkari nungitba Shiite Muslim telok, Hezbollah den tesendaktep junga yua alisang, Aoun ya taoba hopta Lebanon Tir shima liasü.
Iran linük ya Syria Tir, Bashar al-Assad aser pai aniba Syria sorkar pusemertem aser kidangsüa aliba Lebanon nungi Hezbollah telok pusemer linük ka lir.
“Iran aser Lebanon na tsüngda tesendaktep tajungba yanglua, asen linük anaprongla nem arok tajangzük bener arütsütsü jangrar,” ta Zarif-i tanü Aoun den lemsatepa liasü.
Lebanon parliament-i arishi küm 29 tain Aoun taoba Hombar nü shimba sülen par linüki taoba ita 29 tashi Tir meli arubaren tembangja liasü.
Lebanon nung yimtenren telok balala rong nung mangtettep adokba den kidangsüa aliba Syria linük nung tongpang maneni raraba ajanga par linüki nungdakba tongti telemtetba magiteti aruba den par rongsenren terenloka meliteti aru.
Aoun-i Tir menden benokba sülen mapang jilia nangzüktepba ama, par Ato Kilonser menden bendaktsütsü atema Sunni Muslim yimsüsür, Saad al-Hariri shima liasü.
Aoun Tir aser Hariri Ato Kilonser shimba ajanga Hezbollah teloki Lebanon indang yimsüsütsü tashi tetsükdaktsü kecha mongui angutsü jenjang tajung ajangzüka lir.