Prague, November 11 (Agencies): Iran foreign minister, Javad Zarif-i Czech Republic yimtiba, Prague tanü, Hokolbar nü semdangogo.
Alima tashi abenba linüktemi Iran anema taoba mapang benokba tenokdangba sentong agienba sülen par linüki Czech lenirtem den shishilembatsü aser nübur nem tajangzük bener arutsütsü den sentakba nuclear mapatong takok ngua inyaktsü onüktem benoka jembitsü nükjidong nung Zarif-i tan Czech linük semdanger lir.
Iran’er nuclear mapatong lenisangi Czech lenirtem den taküm, 2016 küm May ita ajurutepa, par linük ana tsüngda nuclear mapatong amalitepa inyakteptsü tezüngüzktep agir ita 6 buba nung Zarif-i tan Czech linük semdanger lir.
Par nüburtem nem nungdakba tajangzük bener arutsütsü nükjidong nung Iran-i par nuclear mapatong takok ngua inyaktsü atema Europe nung tentetba linüktem nungi teyari bushitsü tenzüka lir.
Ajisüaka, Zarif aser Czech Republic foreign minister, Lubomir Zaoralek nati tanü senden amendang kechi telemtetba agi, iba osangbo alima dang tang tashi memetetdaktsüi lir.
Iran nunger tongti shishilembartem anisang, Zarif-i Zaoralek den ajurutepa senden amenba den külemi, Czech Republic Ato Kilonser, Bohuslav Sobotka aser Parliament lower house nung Speaker, Jan Hamacek na dena ajurutepa senden amenba osang angazükogo.
Iran-i par tongpang nung amshitsü nuclear osettsüset yanglutsü mapatong anenba melena, alima linüktemia par linük anema benokba tenokdangba sentong agientsü tezüngzüktep ka Iran aser alima linük lenirtemi yaküm agia liasü.
You must be logged in to post a comment Login