Iran-i Boeing den tayimtsü alizüktsü tezüngzüktep agir

Tehran, June 22 (Agencies): US’er taymtsü aser tayimtsü osettsüset yangluba tongti telok, Boeing nungi nüburtem aniba jet tayimtsü alizüktsü tezüngzüktep ka Iran-i agiba osang jangjaogo.
Tan tezüngzüktep agiba ya küm 37 shi nung Iran aser US linük na tsüngda shishilembatsü tezüngzüktep tulutiba agir lir.
Tan agiba tezüngzüktep ya mapa küma inyakra, Iran sorkari par airline, Iran Air atema dollar sen billion 25 shi jenjang aketba Boeing jet tayimtsü 100 shi alizüktsü renemer lir.
Iran-i alima tashi abenba linüktem den nuclear tezüngzüktep agiba sülen alimai par linük anema benokba rongsenren tenokdangbaren timba ka agienogo aser iba yongji, Iran Air-i tetsükdakba kecha majurui par tentet jenjang temaba jenjang nung ajungkettsü maparen tenzüker lir.
Iran sorkari nüburtem aniba tayimtsüsa alizüktsü tezüngzüktep Europe nung tentetba Airbus telok dena tawa  agiogo.
Iran-i nuclear tezüngzüktep kübok agiba telatetba ajunga mapa küma inyakba kuli tejangja anguba sülen US Tir, Barack Obama-i aniba US sorkari temelaba agütsü aser iba sülen par teloki Iran den tayimtsü ayoktsü tezüngzüktep agiba osang ka Boeing telokia metetdaktsüogo.
“Boeing teloki US sorkar den tangatettep nung Iran aser par sorkari ketdangasüba tayimtsü tentettem den shishilembatsü renema lir,” ta par teloki sangoktsü.
“Iran den agiba nuclear tezüngzüktep, Joint Comprehensive Plan of Action (JCPOA)-i lenmang lapoktsüba ama, Boeing teloki tan Iran den shishilembatsü tezüngzüktep agir lir,” ta US State Department otongdar, John Kirby-ia metetdakja liasü.
“America nung tentetba tayimtsü teloktem densema, alima ajunga nung tayimtsü aser tayimtsü osettsüset yanglur teloktemi Iran den ozüngi melaba ama shishilembatsü lenmang JCPOA-i sadema lapokja lir. Iran den shishilemba ajanga telok anaprongla nem rongsenren tajangzük bener arutsütsü,” ta paisa shisem.