Iran-i helicopter tayimtsü bentetba catamaran rong sayaogo

Tehran, September 13 (Agencies):  Iran’er Revolutionary Guard mitkari helicopter tayimtsü den nisung 100 dak tema anitetba rong tasen ka tanü, Mongolbar nü sayaogo.
Persian Gulf tzüyim nung US mitkar rong den tongpang raratsüsa tensa tawa ajuruba sülen Iran mitkari kanga kara jajatetba rong tasenbaji tan sayar lir.
Catamaran rong mesükba rong tasenba tasazük lendenlen meter 14 talang aser metonglen meter 55 talang aliba aser iba rongi knot 28 tashi kara jajatetba osang ka Iran sorkari ketdang asüba IRNA news agency-ia metetdaktsüogo.
“US mitkartemi Persian Gulf nung par mitkar mapatong inyakba ajanga tensa mejungi kümdaktsüba den külemi, iba tzüyim shilem nung temzüng ozünga raksatsür,” ta shia,   US-i par tzüyim sepai aser rongtem Persian Gulf nung yutsüba maparen aitsüba olen ka Revolutionary Guard nung Chief Admiral, Ali Fadavi-i tanü rong sayaba sentong nung metetdakja liasü.
“Tan rong tasen sayaba ajanga Iran’er tzüyim mitkar tashi tali ulushitsü imlar,” ta Revolutionary Guard kübok 2 buba Navy Fleet nung commander, Admiral  Ali Razmjou-ia tanü sentong nung metetdaktsü.
Iran aser US na tsüngda tzüyim den sentakba tesendaktep kanga mejungi aruba mapang ka nung Iran-i par rong tasenba ya sayar lir.
North Arabian Gulf tzüyim nung Iran’er rong kati US rong ka anasa aoba sülen US Navy rong kati injang bomb 3 tashi rong anasa kalokja amokmerena taküm August ita tensa tamajung ajuruba osang bushiteta lir.
Iba tatalokba atalokba anogo 1 jakdang Strait of Hormuz tzüyim nunga Iran’er rong tila 4 tashi USS Nitze anasa aoba sülen US rongi injang bomb kalokja amokmerena liasü.
Ano külen, Iran’er tzüyim mitkartemi US Navy züngsem nisung 10 tashi mapang tatsüka atema taküm January ita pua ayuba osanga jangjaogo.