Iran-i kiralongra mapa nungiter ta Kerry-i ashibaji tai

Tehran, April 10 (Agencies) : Iran-i kiralongra mapa nungita yarir ta Deobarnü US Secretary of State John Kerry-i ashibaji pa tejembitsü mali jembiba aser tamendakdak maliba o lir ta Iran-i aitsüogo.
“Pai jembiba o ya kecha tamendakdak makai jembiba ajanga nübur shingaia anga mali, ta Iranian Foreign Minister Javad Zarif-i Estonian Foreign Minister Marina Kaljurand den külemi osangbenertem den jembiba mapang ashiba Xinhua news agencies ajanga ashi.
“Kiralongra aser yimten anema mapa inyakertemi Iran nung lendong kanga agütsür aser item ajak ya US inyakyim dak keta lir,” ta Zarif-i ashi.
Ajisüaka tia makai pei tang nüngdakba ataloktsü mechi nung state kari yimten anema  inyaker aser Islamic State (IS) inyakyim nung asemer dang ashi tanüngba nüburtem ajak yamaji masü ta US-i ashiba o aija pai shisem.
Iran-i Middle East tensa tamajungba kümdaktsütsü memerangi Yemen aser Syria tesemtem nung tensa tajungba kümdaktsütsü merangtsüla, ta Brihostibarnü Kerry-i Bahrain nung ashi.