Iran-i Long-Range Cruise Missile sayaogo

Dubai, Tsükali/February 2 (Agencies): 1979 Islamic Revolution küm 40 ajungba amungba mapang Honibarnü Iran-i cruise missile tasen ka sayaogo. Iba missile tasenba indang range ji 1,300 km (800 miles) asütsü, ta state television sangdong ka ajanga metetdaktsü.
“Iba cruise missile ya renemtsü asoshi mapang tatsüka dang agir aser low altitude nunga yima oteter,” ta defence minister Amir Hatami-i ashi.
Hatami-isa, surface-to-surface missile; Hoveizeh ya Soumar cruise missile tem rongnung ka lir koba 2015 küm sayaa liasü, ta ashi.
Western expert temi ashiba agi, Iran-i parnok indang weapon temi inyaktettsüba dak sendakba nung aiben talila osang puraloker agütsür, ajisüaka long-range ballistic missiles dak sendakba nung tebilemtsü lir.
Revolutionary Guards’ aerospace division tekolakba Amirali Hajizadeh-i ashiba agi, Iran-i cruise missile tem atema jet engine tem yanglutsüba nung tetsükdaktsü adokba ajangtetogo aser tangbo raradang amshiba hadir balala yangluteter.
Iran-i ashiba agi, parnoki January ita satellite ka lunch asütsü asoshi merangdangba tamakok nguogo. US-i iba amala inyakyim paitoktsü asoshi tekümdangtsü agütsüba sentoker Tehran-i iba jenjang agia liasü.
Tehran-i rocket asem lunch asütsü aliba dak sendakba nung Washington-i taoba ita Iran amokmerenogo, kechiyong parnoki ballistic missile technology amshir koba UN Security Council resolution anema lir.
UN Security Council resolution ka ajanga Tehran dang nuclear weapons abentsüba ballistic missiles tem küm ti tashi meyanglutsü tetuyuba agüja lir.
Kasa mapang nung Iran-i ashiba agi, missile tendangba tem ya tezüngzüktepba anema masü aser item missile tem yagi nuclear warheads mebentettsü. Item missile tem ya parnok kümzüka ayutsü aser amokmerentsü atema lir ta shia missile programme tem dak sendakba nung sensaksemtsü ayongba magizük.