Iran-i missile tendangba ajanga ‘nuclear accord’ raksaogo

Tehran, October 12 (Agencies): Iran-i Deobar nü tatar hoho senden akatsü ghonda ishika lia long-range ballistic missile ka tendangba ajanga July ita nung Iran aser world powers tem tsüngda renema ayuba alema inyaker amai kümogo, ta state news agency IRNA-i ashi.

Parnoki tan missile tendangba ajanga world powers trok den Vienna nung tezüngzüktep ayuba raksar alitsü akok. Iba terenemba nung Iran-i missile yangluba aser tendangba tsütsü tenokdangba agüja lir.

Iba terenemba yanglua ayuba sülen United Nations Security Council-i parnok resolution nung ocet tasen ka enoksemogo aser ibaji ajanga Iran-i missile tasen yanglutsü nokdanger. Mongintemi iba ocet tasenba atema ka rasaa jembishinüdar.

2013 küm nungi nuclear tsütsü olemtep agia aruba mapang nungi Iran nung lennir kari missile tendangtsü kanga ajungshia liasü.

‘Emad’ ta tenüng jatsüa tendangba missile ya Iran meyong Shahab-3 missile sentong nung mera tasen ka ama züngshir kechiba süra iba missile yagi amaktsü tesem lateter yokba tesem matong tashi nisungi anishi aser azüoka anir oa kahloktsütetter, ta Iran defense minister, Hossein Dehghan-i Fars news agency nung ketdangsertem dang ashi.

Küm ter tsüngda Iran-i ‘nuclear’ sentong asoshi sen aika entokogo aser parnoki yangluba missile tem yagi Europe lima tashi tonga kahloktsütettsü.

“Linük wazüka ayutsü asoshi aser missile yanglutsü atema onoki shinga danga temelaba agitsü menüngdak,” ta Dehghan-i ashi.

Deobar nü tatar hoho nung nuclear tsütsü bill ka atema renemogo, ajisüaka iba indang osang tejangja ano kecha memetetdaktsü.

Iran nung ‘Atomic Energy Organization’ nung tekolakba, Ali Akbar Salehi-a iba bill pu asemtsü asoshi tatar hoho nung dena liasü.