Iran-i missile tendangba atema temerenshi agütsüner:Israel

Jerusalem, March 13, 2016: Iran-i tan ballistic missile tendangba asoshi parnok nem temerenshi agütsütsü atema alima nung tashi keter, P5+1 linüktem nem takhangba ka agüjang ta Ato Kilonser Benjamin Netanyahu-i Israel yimtenren nung ketdangsertem nem ozüng agütsüogo, ta pa office ajanga tanü Deobarnü metetdaktsü.
Iran-i missile tendangba tsütsü maneni aibelenba anema tim mera agitsü asoshi Netanyahu-i foreign ministry dang P5+1 linüktem den tongteprateptsü metetdaktsüogo, ta English oshi sangdong ka ajanga metetdaktsü.
“Ibai kanga rongdak mera ka lir aser iba mapa ajanga tashi aketba linüktemi nuclear dak sentakba nung lemteta aliba ochi shia benshitettsü asü mebenshitettsüar aji tendangba mapang ka amai asütsü,” ta sangdong ajangsa metetdaktsü.
Tehran nuclear sentongji nüburtem nüngdak asoshi dang asütsüla ta süra Iran nuclear inyakyim nokdanger aliba lapoktsütsü, ta UN Security Council nung aliba, tashi keter linük pongu den Germany dena (P5+1)-i Iran den nangzükteper liasü.
Israel-i iba ya kanga memulungi liasü.
Iran nuclear inyakyim nung temelaba agütsüba sülen onoki Bodhbarnü long-range ballistic missile ana tendangogo aser Mongulbarnüa kasa tentendangba ka agiogo, ta Iran-i ashi.
Iba tendangba maparen aitsür, ta Israeli foreign ministry sangdong ka ajanga metetdaktsüogo.
“Missile tem raradang amshitsüsa yanglua tendangba ajanga Iran-i shitakba jembiba ama inyakdar na ta tasüngdangba ka arur,” ta sangdong ajanga ashi.
US nungi United Nations atema ambassador, Samantha Power-i, Security Council-i iba dak sentakba olemtepji Hombarnü akatsü shiogo, ta metetdaktsü.
United States-i iba inyakyim atema kanga arok ia bilemtsür, ta lai kasa sangdong ajanga ashi.
January 16 nü nungi tenokdangba salatsüba sülen Tehran anema tenokdangba timba ka agienogo. Ajisüaka temzüng 2231 kübok ballistic missile technology ajanga ‘nuclear warhead’ amshitettsü ta asübajibo akhi ama alitsü
Onok nuclear tashi tokteptsü atema iba inyakyim tenzük masü, ta Iran-i metetdaktsüogo.