Iran-i missile tendangbaren anentsüla: Ban

United Nations, July 09 (Agencies): Iran linüki tongpang nung amshitsü ballistic missile tendanga kadokba maparen anentsü tajungshiba olen ka United Nations (UN) Secretary General, Ban Ki-moon-i metetdaktsüogo.
“Iran-i par missile tendanga kadokba ajanga par linüki alima tashi abenba linük lenirtem den yaküm, 2015 küm agiba nuclear tezüngzüktep anema inyaker,”  ta shia, Iran-i par missile tendangba maparen anentsü tajungshiba olenji Ban-i metetdaktsü.
Paisa ashiba agi, Iran-i par tongpang nung amshitsü missile balala tendangba ajanga par linük tentetdak, Mideast nung tensa mejungi kümdaktsütsü aser par linük den kidangsüa aliba linüktem nem tebilemtsü khuret agütsütsü.
Iran-i tongpang nung amshitsü nuclear osettsüset yangluba maparen anenba melena, alimaia par linük anema benokba tenokdangba sentongtem balala agientsü asoshi alima tashi abenba linük 6 nungi lenirtem aser Iran nati yaküm tezüngzüktep agia liasü.
Iba tezüngzüktep kübok Iran-i nuclear tongpang oset mesenloktetba ballistic missile ka danga metendangtsü ocet densema lir.
Ajisüaka, Iran-i iba tezüngzüktep anema inyaktsü tenzükba sülen par linüki missile tendanga kadokba maparen den sentakba onük UN Security Council (UNSC) nung benoka jembitsüsa akümba osang angazükogo.