Iran-i nuclear tashi amshiba rong yanglutsü: Rouhani

Tehran, December 13 (Agencies): United States (IS)-i nuclear tezüngzüktep anema inyakba nem telangzüba agüja, Iran linüki nuclear tashi amshiba mitkar rong yanglutsü asoshi par scientist-tem nem ozüng agütsüba osang ka Iran Tir, Hassan Rouhani-i tanü, Mongolbar nü metetdaktsüogo.
US Congress yimsüsürtemi Iran anema benokba tenokdangba sentong maneni küm 10 tashi talangba küm atsülangshitsütsü telemtetba ka taoba November ita agiba sülen Iran-i tapet telangzüba agütsütsü asoshi amokmerena aru saka par linüki tan mezüngsüa mapa agi par mepelaba sayur lir.
“Ozü mitkartem tesem ka nungi tesem tangai anir senzütsü atema nuclear tashi amshiba rong yanglutsü ozüng agütsüogo,” ta Rouhani-i sangoktsü saka par linüki rong dang asü, tzü telung nung senzütetba submarine rongtema densema yanglutsü tenzüker iba osangbo pai memetetdaktsü.
Par linüki nuclear tashi amshiba submarine rong mezüngsüa, 2012 küm yanglu tenzük saka alima tashi abenba linük lenirtem den nuclear tezüngzüktep 2015 küm agiba sülen par linüki iba maparenji anena liasü.
US Tir tasenba akümtsü temeten ngua alisang, Donald Trump-i par election nüboyimtsü sentongtem nung Iran den agiba nuclear tezüngzüktep agientsü bilemba osang sangoktsüba den tan Rouhani-i nuclear tashi amshiba rong yanglutsü ozüng agütsüba osang sangoktsüba ajanga US sorkari tebilemtsü khuret tulu benok tenzüktsüsa tang tensa bener arutsür lir.
Ano külen, Iran’er nuclear mapatong tendanga reprangshitsü atema Austria kübok Vienna nung tesepti tentetba International Atomic Energy Agency (IAEA)-ia tan Rouhani-i sangoktsüba osang den sentakba osang kecha mesangoktsüi lir.
“US-i taoba küm agiba Joint Comprehensive Plan of Action mapa küma meinyakba aser par yimsüsürtemi nuclear tezüngzüktep anema inyaka, ozü Iran linük anema Iran Sanctions Act (ISA) tenokdangba sentong maneni küm 10 agi talangba küma atsülangshitsü lemtetba nem telangzüba agüja, ni ozü Atomic Energy Organization of Iran nem nuclear tashi amshiba rong yanglu tenzüktsü ozüng agütsüogo,” ta Rouhani-i nenshia ashi.