Iran-i P5+1 senden jateper

Tehran, December 17 (Agencies): P5+1 ta ajaba alima tashi abenba linüktem den senden ka amentsü osang sangdongtsü asoshi Iran Foreign Minister, Mohammad Javad Zarif-i shidi ka ajanga European Union (EU) foreign policy lenila, Federica Mogherini dang tanü, Honibar nü metetdaktsüogo.
United States (US)-i par linüka anema Irans Sanctions Act (ISA) tenokdang sentong benoktsü mapang küm 10 agi talangba küma atsülangshitsü lemtetba sülen P5+1 telok den taoba 2015 küm agiba nuclear tezüngzüktep den sentakba onüktem benoka jembitsü nükjidong nung Iran-i tan sendenji jatepogo.
US Tir, Barack Obama-i ozüng küma agizüktsü atema pa maitsü majenotsü aka, US Congress yimsüsürtemi agizükba ISA onük ozüng küma tawa agizük.
Par linük anema ISA tenokdangba mapang talangba küma atsülangshibaji US-i nuclear tezüngzüktep anema inyaker ta Iran-i metetdaktsüogo.
Ano külen, International Atomic Energy Agency (IAEA) nung Director General, Yukiya Amano-ia Iran yimtiba, Tehran tan Deobar nü semdanga, Iran lenirtem den ajuruteptsü sentong renemba osang ka Iran sorkar ketdangsertemi metetdaktsüogo.
JCPOA ta ajaba alima tashi abenba linüktem aser Iran na tsüngda agiba nuclear tezüngzüktep mapa küma inyaktsü den sentakba onük benoka jembitsü nükjidong nung Amano-i tan Tehran semdangtsü sentong renemer lir.
Amano-i Tehran tonga aoba sülen Iran’er Atomic Energy Organisation of Iran (AEOI) lenisang, Ali Akbar Salehi densema, tongti Iran lenirtem den ajurutepa senden amentsü sentong lir.
Iran-i tenzükba nuclear tongpang oset yanglutsü mapatong anentsü melena, par linük anema benokba sentongtem agientsü tenangzükba, JCPOA tezüngzüktepji US, Britain, China, Russia, France aser Germany densemba P5+1 teloki 2015 küm July ita agi aser iba tezüngzüktepji taküm, 2016 küm January ita nungi tenzüka, mapa küma inyaktsü renem.