Tehran, February 10 (Agencies): Iran-i Russia linük nungi Sukhoi-30 fighter jet tayimtsü ishika alizüktsü tezüngzüktep agitsü renemba osang ka Iran Defence Minister, General Hossein Dehghan-i tanü, Bodbar nü metetdaktsüogo.
“Iran-i Sukhoi-30 fighter jet tayimtsü ishika alizüktsü asoshi Russia den tezüngzüktep agitsü renema lir. Iba tezüngzüktep asangsang nung agiba sülen ozü linükia jet tayimtsü yanglutsü maparen nung shilem agitsü,” ta pai ashi.
Ajisüaka, par linüki jet tayimtsü kwi shi Russia nungi alizüktsü aser kasaji koba mapang tashi nung alizüktsü iba osang tejangjabo Dehghan-i memetetdaktsü.
Tongpang nung amshitsü nuclear tongpang osettsüset yangluba ken o nung ajemdaker United Nations (UN)-i Tehran anema tenokdangba sentong benoka ajanga 2010 nungi tenzüka Iran aser Russia na tsüngda agiba tongpang osettsüset alizüktsü tenzüngzüktep nokdanga aruba sülen Russia-i par S-300 air defense missile systems Iran tongtsütsü tenzükogo.
1970s mapang yangluba taoba Soviet MiG aser US’er F14A Tomcat tayimtsütem densema, Iran’er air force-i tesüiba mapang amshiba tayimtsütem yanglushir amshiba osang bushiteta lir.
You must be logged in to post a comment Login