Iran-i Saudi lenirtem anema okadak ken o benoktsü amokmerener

Islam tamangba yimsü benshirtemi kümshi semdanga par tekülem mapang agidak, Saudi Arabia kübok Mecca nung tentetba Grand Mosque noksa ka yangi angur. Taküm agiba hajj külem küja sentong nung shilem agir nisung 700 dak tema tawa ajemseta asür rong nung Iran nunger nisung 136 shi densemba osang bushiteta lir. (Mecca, September 26)

Tehran, September 26 (Agencies): Iran’er State Prosecutorsangi Saudi Arabia’er chuba kibong anema international okadak nung külemküjar tepsetba ken o benoktsü amokmerenba olen ka tanü Honibar nü metetdaktsüogo.
Islam tamangba yimsü amangertemi par taküm nung kenbosa agitsü latetsüba aser alima tesem balala nung alir Muslim nisungtemi kümshi par sarasadem mapang aser külem küjatsüren agitsü asoshi Saudi kübok Mecca semdanger.
Aji oda, taküm agiba hajj külem küja sentong agir nisung 700 dak tema ajemsetba lendong ka tawa Mecca nung atalok aser iba lendong ajurur rong nung Iran sensotema nisung 136 tashi densemba osang jangjaogo.
“Tan atalokba hajj lendongji okadak ken o benoktsü temsüba ozüng alema inyakba maparen lir,” ta Ebrahim Raisi-i tanü television ajanga metetdaktsü.
Paisa ashiba agi, Saudi chuba kibong züngsem kar süidaktsütsü nükjidong nung Saudi sorkar ketdangsertemi külem küjartem jajaba lenmang nokdang aser ibaji ajanga tan lendongji atalok.
Tan lendong nung ajemseta asür nisung 719 rong nung Iran nunger külem küjar timba asüba osang tanü tashi nung jangjateta lir.
Tan lendong atalokba sülen par taoba Lebanon ambassador, Ghazanfar Roknabadi, Iran sorkari ketdang asüba television osangbener 2 aser par yimtenren ken o bentettsür ka tanü tashi monguteti tebushidak lir ta Raisi-isa metetdaktsü.