Iran-i short-range missile tasen ka sayaogo

Tehran, August 22 (Agencies): Iran-i short-range solid fuel ballistic missile tasen ka tanü Honibar nü sayaogo.
Iran’er Defence Industry Day anogomong den sentaktepa par linüki Fateh-313 mesüra Conqueror ta ajaba surface-to-surface missile ya tanü saya.
Tanü missile sayaba sentong nung Iran Tir, Hassan Rouhani-i shilem agia, “Lendong kanga sashia atalokdak, Middle East nung mitkar tashi aitba ajanga dang yimji yimjung litettsü,” ta sangoktsü.
Par linüki taoba mapang yangluba Fateh-110 tajungba küma yangluba missile tasenba ya mapang talangba rizünga yutetba den külemi, kasaji kilometer 500 shi pilaba tesemtem tonga kadoktetba osang jangjaogo.
Iran aser alima tashi abenba linük lenirtemi taoba July ita nuclear tezüngzüktep agiba sülen United Nations Security Council (UNSC)-i agiba 2231 buba telemtetba kübok Iran-i tongpang nung amshitsü nuclear bomb bentetba missile tasen meyanglutsü tetuyuba Iran nem agüja aliba ama, tanü sayaba missile-ji nuclear bomb mebentetba missile ka aliba osang Iran-i metetdaktsüogo.
Kasa telemtetba kübok Iran-i taruba küm 8 asoshi tongpang nung amshitsü osettsüset bendang linüktem nungi malizüktsü tenokdangba benoka lir saka par Iran-i iba telemtetba magizükba olen ka Rouhani-i tanü nenshia metetdaktsüogo.
“Ozü Iran-i linük mashika nungi nungdakba tongpang osettsüset alizüktsü aser yamaji inyaktsü asoshi shinga nungi temelaba memeshitsü. Ano, ozü linüki linük mashika nem tongpang osettsüeta ayoktsü temeten ayur,” ta pai shisem.
“Kidangsüa aliba linüktem nung tensa mejungi aliba mapang ka nung ozü Iran indang mitkar tashi itshitsütsüji kanga dang tongtipang,” ta pai sangoktsü.