Iran-i US tzüyim mitkartem chioker

Dubai, January 13 (Agencies): Iran-i mapang tatsükba pua ayuba sülen US tzüyim miktar züngsem 10 tashi tanü Bodbar nü chiokogo.

US mitkartemi memeteti Iran’er tzüyim telungi ai ta osang jangjashiba sülen US Navy patrol rong 2 nung yashi Mongolbar nü apuba mitkar züngsem 10-ji chioka osang ka Iran’er Islamic Revolutiongary Guard Corps (IRGC) lenirtemi metetdaktsü.

“US mitkar rong anati memeteti ozü Iran tzüyim telungi aitba osang bushitetba sülen onoki pua ayuba us mitkartem chiokogo,” ta parnoki ashi.

“Iran mitkartemi ozü mitkartem merenshiba osang bushiteta mali,” ta shia, Pentagon-ia tanü US mitkartem chiokba osang jangjatsüogo.

Ajisüaka, US tzüyim mitkartemi aniba rong anaji komaser Iran tzüyim telungi ai iba osang tang tashi mejangjateti lir.

Tanü chiokba US mitkartemji US Navy tayimtsü ka nung anioker Bahrain tonga anir aoba osanga jangjaogo.

“Ken o tulu kecha madoki ozü mitkartem chiokba atema kanga pelar. Ozü mitkar takümtem kümzüka anitetba maparen nung ozü lenir, US Secretary of State, John Kerry-i tongti shilem agiba atema pa dang pelaba metetdaktsür,” ta US Defense Secretary, Ash Carter-ia metetdaktsü.

“Rong senzüsenpongtsüren tendangba oset raksaba ajanga US tzüyim mitkar rong anaji Iran tzüyim telungi aitba osang jangjaogo,” ta IRGC Rear Admiral Ali Fadavi-ia metetaktsüogo.

Iran aser US densema alima tashi abenba linüktem na tsüngda yaküm agiba nuclear tezüngzüktep mapa küma inyak tenzüktsü renemshiba mapang ka nung tan iba tatalokba ya ataloker lir.

Iran anema benokba rongsenren tenokdangbatem agientsü melena, Iran-ia par linüki tenzükba tongpang nung amshitsü nuclear osettsüset yanglua kasaji rizüngba maparen anentsü asoshi nangzüktepa lir.

“Tan atalokba tatalokba ajanga US Congress nung Iran anemertemi Iran indang tashi asangsang nung ajitettsü,” ta Iran mitkar lenisang, Major General Hassan Firouzabadi-ia metetdaktsüogo.

Iran indang lenisütsü menden melenshitsütsü nükjidong nung US-i par mitkartem yoka Iran arrtsülen mitkar mapatong balala inyaker ta IRGC lenirtemi US dak temulung melemteti aliba osanga jangjaogo.

IRGC mitkartemi ali aser tzüyim naprongla nung par duty inyakba den külemi, kidangsüa aliba Saudi Arabia aser Bahrain nung tentetba US tzüyim mitkar tesep anasa densemba tesemtem nung mapang shia mitkar terenemshiba sentong agir.

IRGC-i ketdang asüba rong kati US’er tayimtsü abenba rong, USS Harry S. Truman rong anasa, Strait of Hormuz tzüyim tesem nung rocket kalokja amokmerenba osang ka US Navy-i taoba hopta metetdaktsüogo.

Ajisüaka, par tzüyim mitkartemi yamaji meinyak ta shia, IRGC-i US-i benokba aitsüba olenji magizüki lir.

You must be logged in to post a comment Login