Iran-i Vienna nung amentsü ayongba Syria senden nung shilem agitsü

Tehran, October 28 (Agencies): Iran Foreign Minister, Mohammad Javad Zarif aser par deputy 3 tashi Austria kübok Vienna yimti nung amentsü ayongba Syria senden nung shilem agitsü sentong renemba osang ka foreign ministry otongdar, Marzieh Afkham-i tanü Bodbar nü sangoktsüogo.

“Syria den sentakba mangatettep ken o bentettsütsü asoshi Vienna yimti nung ayongba senden nung shilem agitsü asoshi jaokba ama, ozü lenir, Zarif aser par deputy 3 tashi shilem agitsü renemogo,” ta lai ashi.

“Deputy Foreign Minister 3, Hossein Amir Abdollahian, Abbas Araqchi aser Majid Takht Ravanchi nungeri Zarif den külemi Vienna senden nung shilem agitsü,” ta lai shisem.

Syria Tir, Bashar al-Assad pusemba linük, Iran-i tan mezüngsüa international jenjang nung ayongba Syria senden nung agitsü renemer lir.

Tan Hokolbar nü amentsü ayongba senden nung Egypt, Iraq, Lebanon, European Union (EU), France aser United States nunger densema linük 10 dak tema nungi lenirtemi shilem agitsü renema lir.

Ajisüaka, iba senden nung shilem agitsü asoshi Assad-i aniba Syria sorkar aser Syria sorkar anemba teloktem jaok asü mejaok iba osangbo tang tashi mejangjateti lir.