Iran-i yimjung aser terenlok bushir: Rouhani

United Nations, September 29 (Agencies): Iran aser alima tashi abenba linüktem na tsüngda nuclear tezüngzüktep agiba ajanga aso tasen ka tenzüktsüba den külemi, Middle East ajunga nung yimji yimjung aser tesünep tetenzüker asütsü ta Iran Tir, Hassan Rouhani-i yashi Hombar nü metetdaktsüogo.

“Tan agiba nuclear tezüngzüktepji alizüng ka ajangzüker masü saka tenerenlok aser yimji yimjung bener arutsütsü atema tejemdakdak lung tongti ka lir,” ta tang New York nung temendak United Nations General Assembly senden nung Rouhani-i metetdaktsü.

Paisa ashiba agi, “Alima tashi abenba linüktemi ozü Iran anema tenokdangba sentong balala benoka alibaren mamatsü saka tan nuclear tezüngzüktep agiba ajanga yimji yimjung tajemdakdak ser ajak ajangzüktsüsa terenlok bushitsü asoshi ozü Iran-i renema lir.”

“Ozü Iran-i tsükchitep masü saka yimjung aser terenlok alitsü bushir,” ta paisa shisem.

Ano külen, Iran anema benokba tenokdangba sentongtemji par linük merenshitsü atema masü saka par linük tajungba küma melenshidaktsütsü nükjidong nung benok ta Rouhani jakdang o jembidang US Tir, Barack Obama-ia Iran anema tenokdangba sentong benokba nükjidong den sentakba osang jangjashitsü.